طالبان د داسې پاليسۍ د تصويب هڅه کوي چې د ښځينه ناروغانو درملنه به يوازې ښځينه ډاکټرانې کوي

طالبان د يوې نوې داسې پاليسۍ په هڅه کې دي چې له مخې به د‌ هېواد ښځينه ناروغانو درملنه يوازې ښځينه ډاکټرانې کوي.

واشنګټن پوسټ د طالبانو د‌ عامې روغتيا وزارت له قوله ويلي چې د دوی مشرتابه ياد وزارت ته ځينې لارښوونې لیږلي چې پاليسۍ دې د شريعت نه د طالبانو د تفسير مطابق جوړې کړي.

واشنګټن پوسټ د وزارت د يو مقام له قوله زياته کړې چې دوی د طالبانو د مشر هبت الله ته اړينه يوه پاليسي تر لاسه کړې چې په بنسټ به يې د ښځينه ناروغانو درملنه يوازې ښځينه ډاکټرانې کوي وايي د پاليسۍ په يوه برخه کې راغلي چې ښځې کولی شي په اضطراري حالت کې چې ښځينه ډاکټره نه وي نارينه ډاکټر ته مراجعه وکړي.

په ورته مهال د طالبانو عامې روغتيا وزارت واشنګټن پوسټ ته ويلي چې ياد وزارت هڅه کوي کومو ځايونو کې چې ښځينه ډاکټرانې او روغتيايي پرسونل کم وي غواړو ښځينه ډاکټرانې ډېرې کړو.

خو د هېواد ښځينه او په ځانګړي توګه د نسايي ولادي څانګې ډاکټرانې وايي د ښځينه ډاکټرانو کمښت ته په کتو او د پاليسۍ عملي کولو سره به ډیرې ښځينه له روغتيايي خدمتونو محرومې شي.

دوی وايي طالبان دې لومړی له شپږم ټولګي پورته د نجونو ښوونځي پرانيزي نجونې که زده کړې وکړي موږ به ډیرې ښځينه ډاکټرانې ولرو نو طالبان دې ښځو او نجونو ته د زده کړو او کار اجازه ورکړي.

د طالبانو يادې پاليسۍ او هېواد کې د ښځينه ډاکټرانو کمښت ته په کتو که ښوونځي تړلې پاتې وي او د ښځينه ډاکټرانو شمېره ډېر نه شي نو په راتلونکي کې به افغان ښځې د درملنې په برخه کې له ستونزو سره مخ شي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More