fbpx

ويراټ کوهلي په آى پي ايل کې لومړۍ بريا خپله کړه

د هند تجارتي ليګ کې د ويراټ کوهلي په لوبډلمشرۍ کې د رايل چېلنجرز بنګلور لوبډلې خپله لومړۍ بريا اخر هم خپله کړه. بنګلور په خپله اوومه لوبه کې د کنګز اليون پنجاب لوبډلې ته په ٨ ويکټو ماته ورکړه او په روان ليګ کې يې لومړۍ لوبه وګټله.

د هند تجارتي ليګ يا آى پي ايل ٢٨مه لوبه د کنګز اليون پنجاب او رايل چېلنجرز بنګلور ترمنځ ترسره شوه، د لوبې پچه بنګلور وګټله او پنجاب ته يې د توپوهنې بلنه ورکړه.

د پنجاب لوبډلې له خوا کريس ګيل ډېره ښه توپوهنه وکړه او په ٩٩ منډو ناسوځېدلى پاتې شو، همدا راز لوکېش راهول ١٨، منديپ سنګ ١٨، اګروال ١٥ او سرفراز خان هم ١٥ منډې وکړې.

کنګز اليون پنجاب په ټاکلو شلو اورونو کې د ٤ لوبغاړو په سوځېدو سره ١٧٣ منډې وکړې او د بنګلور لوبډلې ته يې د ١٧٤ منډو هدف وټاکه.

د بنګلور له خوا بيا يوژيندرا چاهل ٢ او محمد سراج او معين علي يو يو لوبغاړى وسوځاوه.

رايل چېلنجرز بنګلور له خوا بيا ويراټ کوهلي او اې بي ډيويلئيرز خوندوره توپوهنه ترسره کړه او په روانو سياليو کې يې په لومړي ځل بنګلور لوبډلې ته بريا ور په برخه کړه.

ويراټ کوهلي ٦٧، اې بي ډيويلئيرز ٥٩، مارکوس سټيونيس ٢٨ او پريتوي پټېل ١٩ منډې وکړې.

د بنګلور لوبډلې ياد هدف په ١٩.٢ اورونو کې د ٢ لوبغاړو په سوځېدو سره پوره کړ او بريا يې خپله کړه.

د پنجاب له خوا بيا محمد شامي او آشوېن يو يو لوبغاړى وسوځاوه.

د افغانستان مخکښ ورو توپ اچوونکى، چې د پنجاب په لوبډله کې لوبېږي، په نننۍ لوبه کې نه و اخيستل شوى.

د هند تجارتي ليګ يا آى پي ايل په روانو سياليو کې چناى سوپر کنګز تر ټولو مخکې ده، چې په ٧ لوبو کې يې ٦ ګټلي دي، همدا راز په دوهم مقام بيا د کنګز اليون پنجاب او په دريم مقام ممبيي انډينز لوبډله ده.