نیمروز کې د تالبانو او ایراني ځواکونو ترمنځ جګړه روانه ده

خبریال وېبپاڼه: نیمروز کې له ایران سره پر پوله د تالبانو او ایراني ځواکونو ترمنځ نښته روانه ده.

د نیمروز له زرنج ښار څخه یوې ځايي سرچینې خبریال ویبپاڼې ته ویلي، چې جګړه نن ماسپښین څه باندې درې بجې پیل شوې او لاهم روانه ده.

سرچینې خبریال وېبپاڼې ته که څه هم د تلفاتو په اړه څه نه دي ویلي، خو زیاته کړې یې ده چې دواړه لوري پر یو بل د سپکو او درنو وسلو ډزې کوي.

لاهم د جګړې د پېښېدو علت نه دی روښانه شوی، خو تر دې وړاندې هم تالبانو له ایراني ځواکونو سره ورته نښتې کړې دي.

د خبریال ویبپاڼې د معلوماتو له مخې، په یاده سیمې کې د ایراني ځواکونو مرمۍ د عامو خلکو په کورونو لګېږي، چې یو شمېر خلک له خپلو سیمو وتلي دي.

د یادونې وړ ده چې څه موده وړاندې د ایران او تالبانو یو شمېر استازو هم د داوړو لورو ترمنځ د اړیکو د ښه والي په اړه ناسته کړې وه، خو بیا هم د دواړو لورو ترمنځ د جګړې خبرونه ورکول کېږي.