فایق: تالبان د خپلو ظالمانه سیاستونو له امله نړیوالو ته ځواب نه لري

خبریال وېبپاڼه: په ملګرو ملتونو کې د افغانستان دایمي استازی نصیر احمد فایق وايي، تالبان نه غواړي چې د خپلو ناسمو او ظالمو سیاستونو د بېرته راګرځولو لپاره ملي او نړیوالو غوښتنو ته ځواب ووايي.

نوموړي دغه څرګندونې د افغانستان د وضعیت په اړه د ملګرو ملتونو د امنیت شورا په غونډه کې وکړې.

فایق په دې غونډه کې وویل چې تالبانو له څه باندې یو نیم کال راهیسې افغان ښځې او نجونې په سیستماتیک ډول له خپلو اساسي حقونو بې برخې کړي دي.

د هغه په ​​وينا، تالبان د افغانستان د بې وزله خلکو د خدمت د ادعا پر خلاف، د هېوادوالو له ناوړه اقتصادي او انساني حالت څخه د خپلو غوښتنو او د خپل واک د ټينګولو لپاره د سودا اخيستنې د وسيلې په توګه کار اخلي.

هغه همدا راز زیاته کړه، تالبانو افغانستان د ټولنیز، اقتصادي او سیاسي نابودۍ په څنډه کې اچولی او د دې ډلې د سیاستونو دوام به د افغانستان د لا زیاتو بدبختیو او بربادۍ لامل شي.

فايق همدا راز وويل، چې د عفوې له اعلان سره سم تالبانو د تېر حکومت په امنيتي او دفاعي ځواکونو جبر او هدفي وژنې زياتې کړې دي.

تر دې مخکې هم د بشر حقونو سازمانونو د بشري حقونو د وضعیت په خرابوالي او په ځانګړې توګه د تالبانو پر ناوړه چلند نیوکې کړي دي.