اروپايي هېوادونو د خپلو وسلو واردات ۴۷ سلنه زیات کړي دي
خبریال وېبپاڼه: د تېرو پنځو کلونو په پرتله اروپايي هېوادونو د اصلي وسلو واردات ۴۷ سلنه ډېر کړي دي.
رویټرز د خپلو خبري سرچینو په حواله راپور ورکړ چې امریکا هم د وسلو په صادراتو کې خپله ونډه له ۳۳ سلنې څخه ۴۰ سلنې ته لوړه کړې ده.
د ستاکهولم د سولې د نړیوال تحقیقاتي انسټیټیوټ لوړپوړي څیړونکي پیټر ډي ویسمن په یوه بیان کې ویلي چې په نړیواله کچه د وسلو د لیږد کمیدو سره سره اروپا ته د وسلو لیږد په ډراماتیک ډول د روسیې او نورو اروپايي هیوادونو ترمنځ د کړکیچ له امله زیات شوی دی.
د رویټرز په راپور کې هغه اروپايي هېوادونه چې له امریکا څخه یې د وسلو واردول زیات کړي, نه دي په ګوته شوي.
ویل کېږي چې پر اوکراین د روسیې برید اروپايي هېوادونه اړ کړي چې له پوځي پلوه ځانونه پیاوړي کړي.
امریکا او روسیه په تیرو دریو کلونو کې په نړۍ کې د وسلو ستر صادرونکي هیوادونه دي.