د جوزجان د حج او اوقافو مدير نامعلومو کسانو وواژه

خبریال وېبپاڼه: په جوزجان کې ځايي سرچينې وايي، چې د دغه ولايت په اقچې ولسوالۍ کې د حج او اوقافو مدير د نامعلومو کسانو له خوا وژل شوى دى.

ځايي سرچينې خبریال وېبپاڼې سره په خبرو کې ويلي، چې دغه پېښه نن سهار د اقچې ولسوالۍ د خرابات کوچې په سيمه کې رامنځته شوې ده.

د آقچې د حج او اوقافو مدير چې مولوي عبادالله نومېده، د ناپېژاندو کسانو له خوا په چاقو وژل شوى دى.

تر اوسه د مولوي عبادالله د وژنې لامل معلوم نه دی.

تر اوسه کومې ډلې د دې پېښې مسوولیت نه دی منلی.

په جوزجان کې تالبانو د دغې پېښې پخلی کړی دی؛ خو دوی په دې اړه نور جزیات نه دي ورکړي.

څه موده وړاندې په فاریاب ولایت کې د تالبانو د اقتصاد رئیس مولوي عبدالرحمن منصور هم نامعلومو وسله والو وواژه.