د امریکا په پنسلوانیا کې چاودنه؛ ۲ تنه وژل شوي او ۹ تنه لادرکه دي
خبریال وېبپاڼه: امریکايي رسنیو خبر ورکړی، چې د امریکا په پنسلوانیا ایالت کې د چاکلیټو په یوه کارخانه کې د چاودنې له امله ۲ تنه وژل شوي او ۹ نور لادرکه دي.
اسکای نیوز راپور ورکړی چې ناڅاپه چاودنه د جمعې ورځ په ویسټ ریډینګ کې د RM palmar co فابریکې کې وشوه.
د ویسټ ریډینګ ښار د پولیسو مشر وین هولبین ویلي، په دې پېښه کې یو شمېر کسان ټپیان شوي هم دي، چې دقیق شمېر یې لا نه دی معلوم.
د ویسټ ریډینګ ښاروال سامانتا کاګ وویل، چاودنه دومره زوروره وه چې د فابریکې ودانۍ یې ونړوله او څلور فوټه یې وغورځوله.
د ځايي چارواکو په خبره، د ژغورنې ځواکونه د پېښې ځای ته رسېدلي او عملیات په شدت سره دوام لري.
د چاودنې علت لا هم معلوم نه دی.
د یادولو وړ ده چې د چاکلیټو دغه فابریکه له ۱۹۴۸ کال راهیسې د امریکا په پنسلوانیا ایالت کې فعالیت لري.
Comments are closed.