افغانان چېرته لاړ شي؟ ګناه یې څه ده؟
د افغانستان په جګړې لسیزې واوختې، بېلا بېلې ډلې راپېدا شوې، ځینې واک ته هم ورسېدې، خو په افغانستان کې د افغانانو ورځ ښه نه شوه، بلکې په یو او بل نوم له دې وطن نه افغانان په کډوال دي، کله یو خوا منډې وهي او کله بل خوا منډې وهي.
پاکستان له تېر کال راهیسې په خپل هېواد کې په افغان کډوالو پسې راخیستې ده، او په زور یې بېرته افغانستان ته رالېږي، هلته یې پولیس افغان کډوال تنګوي، پېسې ترې اخلي، بېعزته کوي یې او کوم چې پېسې نه ورکوي، هغه زندان ته اچوي او بیا یې افغانستان ته لېږي.
ایران هم ورته کارونه کوي او هره ورځ له دغه دواړو هېوادونو نه افغانان په زوره افغانستان ته رالېږل کېږي، په دې کې ډېر شمېر هغه افغانان هم دي، چې ایران او پاکستان ته په سختو قاچاقي لارو باندې تللي دي، چې هلته یو څه کار روزګار وکړي.
په افغانستان کې د طالبانو د حکومت د راتګ سره سم د غېر طالبان خلکو لپاره د کارونو فرصتونه بېخي راکم شوي دي، ډېری خلک له دې امله بېکاره شوي دي، اقتصادي حالت ښه نه دی او په عموم کې بېکاره زیاته شوې ده.
په هېواد کې د افغانانو ورځ بده ده، ګاونډیانو ورسره سور ظلم شروع کړی دی، نو اخر افغانان چېرته لاړ شي؟ اخر د افغانانو ګناه څه ده؟ ولې دا لسیزې وشوې او دوی په ارامه ساه وانخیسته، هر څلور او پینځه کاله وروسته یو نوی هجرت پیل کېږي او افغانان کډه په سر کله دلته او کله هلته منډې وهي.
ایا د اوسني حکومت سرپرستانو دې خبرې ته هم لږه توجه کړې ده، دا د بېکارۍ کچه به کله راکمېږي، ایران او پاکستان ته د افغانانو د تګ وجې به کله له منځه ځي؟ کله به اوسنی حکومت له دغه هېوادونو سره خبرې کوي، چې په خپلو هېوادونو کې افغان کډوالو ته هم د انسان په سترګه پام وکړي؟
د افغانانو دا بدبختي به تر څو پورې روانه وي، چې له کله راهیسې زېږېدلي یو، همدا بدبختي مو لیدلې ده، همدا منډې، همدا جنګونه او همدې حالت سره لاس و ګریوان یو. له دې حالت څخه به کله راوځو؟
ایا څوک شته چې افغانانو ته ووايي، چې ستاسو دا بدبختي به کله ختمېږي؟ ستاسو دا منډې به کله پای ته رسېږي؟ کله به دا جنګونه نور ختم شي؟ کله به افغانان د ارام ساه واخلي؟
