کابل کې د غلاوو ډېرېدل
په کابل کې یو ځل بیا د جمهوریت د وروستیو په څېر غلاوې ډېرې شوې دي. په داسې حال کې چې د طالبانو حکومت وايي غلو ته سختې سزاګانې ورکوي، خو بیا هم په غلاوو کې کمی نه راځي او ورځ تر بلې د غلاوو پېښې زیاتېږي.
د کابل په ارزان قیمت یا احمد شاه بابا مېنه کې د اختر په دې ورځو کې هم له ځین کسانو څخه د وسلې په زور موبایلونه اخیستل شوي دي، په داسې حال کې چې د روژې مبارکه میاشت کې هم په ارزان قیمت کې ورته پېښې ډېر ځله تکرار شوې دي.
په تېره یوه میاشت کې د احمد شاه بابا مېنې د حوزې له خوا د یو شمېر غلو د نیولو خبر هم ورکړل شوی دی، خو بل خوا بیا په غلاوو کې کوم کمی نه دی راغلی او له ماښام وروسته خلک له ویرې له ځان سره پېسې او موبایلونه نه شي ګرځولی.
د روژې په میاشت کې د ارزان قیمت لسم بلاک کې په رڼا ورځ یو کور ته غله وراوښتي، خلک یې ټول په یوه کوټه کې بند کړي دي او په کور کې یې د طلاوو او پېسو ترڅنګ ډېر ګرانبیه شیان هم له کوره وړي دي، خو طالبانو تراوسه پورې یاد کسان نه دي نیولي.
نه یوازې د احمد شاه بابا مېنې اوسېدونکي، بلکې د کابل خلک له غلاوو څخه شکایت کوي او له طالبانو غوښتنه کوي، چې د غلاوو مخه دې ونیسي او په کابل کې د امنیت لپاره دې ګامونه پورته کړي.
د یادولو وړ ده، چې په کابل کې د بېکارۍ زیاتېدل هم یو له هغه لاملونو څخه دی، چې ډېر کسان یې د غلاوو کولو ته مجبوره کړي دي، خو بلخوا بیا یوه وجه دا هم ده، چې د داسې خلکو مخه په اسانۍ نه نیول کېږي، نو ځکه غله په ډاډه زړه غلاوې کوي.
