د نجونو په زده کړه بندېز، افغانستان ته کوم تاوان لري؟
د طالبانو د سرپرست حکومت له راتګ سره سم په افغانستان کې تر شپږم ټولګي پورته د نجونو په زده کړو باندې بندېز لګول شوی دی. لومړی په ښوونځیو او وروسته بیا له پوهنتونونو څخه هم نجونې له زده کړو څخه منع شوې.
افغانستان د جمهوریت په ۲۰ کلونو کې د زده کړو لپاره په پراخه کچه کار وکړ، خو بیا هم په ډېرو لیرې پرتو سیمو کې، په ځانګړې توګه د پښتنو په سیمه کې په لوی شمېر کې نجونه له زده کړو بې برخې پاتې وې.
خو د طالبانو حکومت له راتګ وروسته اوس په بشپړه توګه له شپږم ټولګي پورته مکتبونه د نجونو پر وړاندې بند دي، پوهنتونونه بند دي او دا دریم کال دی، چې ویل کېږي د نجونو د تعلیم لپاره په طرحه کار روان دی، خو تراوسه پورې د دغه طرحه په اړه هیڅ معلومات ونه شو.
ایا پوهېږئ، که د طالبانو د حکومت له خوا همدا چاره دوامداره شي او لکه د تېر په څېر دا ځل هم طالبان نجونو ته د زده کړو اجازه ورنکړي؟ نو افغانستان به له کوم ستر تاوان سره مخ شي؟
تر ټولو دمخه او لومړۍ خبره خو دا ده، چې په کومو برخو کې افغانستان ښځینه قشر ته اړتیا لري، هغه به بېخي له صفر سره ضرب شي، د بېلګې په توګه طبي برخه کې به موږ ډاکټرانې او نرسانې ونه لرو، چې د افغان باعزته مېرمنو درملنه وکړي.
له هغه وروسته تعلیمي برخه ده، په دې سختو شرایطو کې به ښوونکې نه وي چې نجونو ته زده کړه ورکړي، نو زده کړې به خامخا بندېږي. د حکومت په ګڼ شمېر نورو چارو کې چې ښځو ته اړتیا ده، په ځانګړې توګه د ښځو اړوند مسایلو کې، چې هلته ښځې د ښځو سره مخامخ شي، په هاغه ځایونو او ساحو کې به هم ښځینه کارمندانې ونه لرو او هر څه به په ټپه ودرېږي.
که چېرته دا بندېز همداسې دوامداره شي، نو افغانستان ته به یو لوی او ستر تاوان ورسوي او د دې تاوان جبران به بیا لسیزې وخت ونیسي، خو بېرته به په اسانۍ سره جبران نه شي.
نو د افغانستان د اوسني سرپرست حکومت له مشرتابه څخه زموږ هیله دا ده، چې نور ژر تر ژره دغه چاره پای ته ورسوي، طرحه جوړه او د نجونو زده کړو ته اجازه ورکړي. که داسې ونه شي نو له یو ډېر لوی او ستر تاوان سره به مخ شو.
