fbpx

ډاکتر عبدالله: د حکومت د دوام په اړه بايد مشوره وشي

خبریال ویب پاڼه / کابل ۲۴ مۍ ۲۰۱۹ – اوسني اجرائيه رئيس او راتلونکو ولسمشريزو ټاکنو ته نوماند ډاکتر عبدالله عبدالله په يوه اعلاميه کې ويلي چې د ملي وحدت حکومت کاري موده پاى ته رسېدلې او د دوام په اړه يې بايد مشوره وشي.
ډاکتر عبدالله ويلي، دا چې ټاکنې په خپل وخت ترسره نه شوې، د افغان سياستوالو او ولس اندېښنې يې ډېرې کړي او په دې اړه د دوى ډله د ولسمشريزو ټاکنو د نوماندانو له يو شمېر غوښتنو سره همغږې ده.
په اعلاميه کې راغلي، د ثبات او همپالنې ټيم د حکومت د صلاحيتونو د محدودلو او په ټاکنو کې د دولتي امکاناتو د نه کارولو په خاطر يوه طرحه وړاندې کړې او له نورو نوماندانو يې هيله کړې چې دا طرحه ورسره ومني.
ډاکتر عبدالله د تېرو لانجمنو ټاکنو په دويم پړاو کې خپله ماتې و نه منله او له څو مياشتې جنجال وروسته د يوه سياسي توافق په اساس اجرائيه رئيس شو چې په حکومت کې يې پنځوس سلنه ونډه درلوده، خو له توافق وروسته هم په ډېرو مواردو کې د ولسمشر غني مخالف پاتې شو او په حکومت کې دننه يې د اپوزيسيون دنده مخ ته وړله.