کرونا سره مبارزه کې بهرنۍ مرستې کافي نه دي

خبریال وېب پاڼه/ د کډوالو نړیوال سازمان د کرونا پر ضد د مبارزې په برخه کې بهرنۍ مرستي کافي نه بولي او پر دغه ویروس د شکمنو کسانو ظرفیت ټیټوالي او د کوویډ١٩ ناروغۍ باندې د اخته کسانو درملنې لپاره د ځانګړو وسایلو له کمښت څخه خبرداری ورکوي.

یاد سازمان وایي چې دغه ننګونو په افغانستان کې پر کوویډ١٩ ناروغۍ د روغتیایي بنسټونو د کارکونکو احتمالي اخته کېدل هم زیات کړي.

د یاد سازمان یوه برخه وایي، افغانستان زیات شمېر آزمویښتي کیټونو ته بېړنۍ اړتیا لري او بله جدي اندېښنه دا ده چې دغه هېواد د شدیدو مواردو درملنې لپاره لږ اندازه مرکزونه لري.

شونې ده چې د بېلابېلو لاملونو له کبله افغانستان د کویډ١٩ څخه زیات اغېزمن شي.

یاد سازمان دغه راز ویلي دي چې افغانستان کې د کرونا ویروس د خپرېدا څخه د دوو میاشتو په تېرېدو سره لا هم ٦٠ سلنه کلیوال خلک د کویډ١٩ ناروغۍ له امله د اوښتو ګواښونو په اړه پوهاوی نه لري.

له دې سره د افغانستان د عامې روغتیا وزارت وايي د دې سره سره چې په هېواد کې د مثبتو پېښو ثبت د اندېښنې وړ دی خو افغانستان د کورنیو او بهرنیو سرچینو څخه ګټورې استفادې سره توانېدلی شو چې د نورو هېوادونو په پرتله د کرونا ویروس د لا خپرېدا مخنیوي په برخه کې ګټور ثابت شي.

د کډوالو نړیوال سازمان دغه راز خبرداری ورکړی دی چې په افغانستان کې پر کرونا ویروس له پنځوس کلونو زیات عمر لرونکو اخته کسانو ژوند ته هیله لږه ده، ځکه چې د دې هېواد زیات شمېر خلک بېلا بلو ناروغیو لکه توبرکلوز، ایډز، خوارځواکۍ، سرطان او د زړه ناروغیو باندې اخته دي.

په ورته وخت کې دا سې ښکاري چې د عامې روغتیا وزارت په هېواد کې د کرونا بحران په مدیریت کې پاتي راغلی.

د کابل د سروبي ولسوالۍ ځینې اوسیدونکي وایي د عامې روغتیا وزارت ناغیړي کوي او د خلکو ستونزو ته پام نه کوي.

دوی وایي شل ورځې مخکې د دغې ولسوالۍ د سلو تنو د کرونا سمپلونه مرکزي لابراتوار ته استول شوي خو لا یې هم پایله نه ده روښانه شوې.

کله کله خو د یوه شخص پایله د بل په نامه راغلې ده، د سروبي ولسوال ګوهرخان بابري وایي په دې وروستیو کې د دغې ولسوالۍ نږدې شپېته کسان مړه شوي چې په ځینو کې یې د کرونا ویروس نښې هم لیدل شوې دي.

هغه وایي په وروستۍ یوه میاشت کې د پنځو ډاکټرانو په شمول ۳۳ کسان په کرونا ویروس اخته شوي دي.

د عامې روغتیا وزارت تر اوسه د سروبي ولسوالۍ د اوسېدونکو د دې ادعاوو په اړه څه نه دي ویلي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More