د ننګرهار زیتونو فابریکه به سږ کال ۱۸ سوه ټنه زیتون پروسس کړي

خبریال وېب پاڼه/ د ننګرهار کانال اړوند د زیتونو فابریکه به سږ کال ۱۸ سوه ټنه زیتون پروسس کړي.

د ننګرهار کانال اړوند زیتونو فابریکې د زیتونو تېلو او اچارو په تولیداتو کې د تېر کال په پرتله سږ کال درې برابره زیاتوالی راځي چې د پروسس کچه به یې د شپږ سوه ټنو څخه اتلس سوه ټنو ته لوړه شي.

د زیتونو فابریکه په ۱۳۶۳ کال کې د اته زره ټنه زیتونو د پروسس په ظرفیت جوړه شوې وه، چې اوس مهال په کې ۱۹ تنه کار کوونکي کار کوي.

په ورته وخت کې د ننګرهار وادي کرنیز شرکت د زیتونو له سوچه او خالص تېلو څخه هره ورځ د ۲۵۰ ملي لیتره په ظرفیت د زر بوتلو د ډکولو پروسه پیل کړی چې په شپږو ورځو کې شپږ زره بوتلې ډکې شوې دي.

د یو بل خبر له مخې د کانال اړوند ۹۵۰ فوټه وچ ناجو لرګي د څلورم فارم څخه د نجارۍ فابریکې د چارو د غښتلتیا په موخه انتقال شول، همدا راز د ماهیانو د روزنې د لس حوضونو د جوړولو چارې په چټکۍ جریان لري.

په ورته وخت کې یاد ولایت کې د ځمکني توت حاصل او تقاضا زیاته شوې ده.

په ننګرهار ولايت کې د ځمکني توت حاصل او تقاضا زياته شوې او مسؤولين وايي، چې په راتلونکو فصلونو کې به دغه کښت ته وده ورکړل شي، چې حاصل به يې د ننګرهار سربېره د هېواد نورو سيمو ته هم ولېږل شي.

ننګرهار کې بزګران وايي، چې سږکال د ځمکني توتانو حاصلات د تېرو کالونو پرتله څو برابره زیات شوي دي؛ خو غوښتنه کوي، چې حکومت دې د بازار موندلو ترڅنک د ځمکني توت د ساتلو لپاره سړې خونې ورته جوړې کړي.

بزګران همدا راز له حکومت څخه غوښتنه کوي، چې د ځمکني توتانو د کرکېلې، حاصلاتو ټولولو، ساتلو، بسته بندۍ او پلور په موخه ورته زمينې برابرې کړي.

د ننګرهار د کرنې او مالدارۍ رئيس انعام الله ساپی وايي، چې له څو کالونو راهيسې په دې ولايت کې په ازمايښتي ډول د ځمکني توتانو کرنه پيل شوې، چې ښه پايله لري.

نوموړی وايي، چې د ننګرهار اقليم ځمکنيو توتانو لپاره ښه مساعده ده؛ له همدې امله يې بزګران له حاصل او مارکیټ څخه خوښ دي.

د کرنې رئیس وايي، چې په دې ولايت کې اوس مهال شپاړلس جريبه ځمکه کې ځمکني توتان کرل شوي، چې په راتلونکې کې له ازمایښتي پړاو څخه د سوداګرۍ سټېج ته ځو او دا ولايت به د ځمکني توتانو صادرونکي په توګه موقف غوره کړي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More