دری میاشتې وروسته اسپانیا بې مړینې شپه او ورځ تجربه کړه

خبریال وېب پاڼه/وروسته له هغه چې له چین وروسته کرونا وبا د ایران له پولو اروپا ته واوښت، ایتالیا او اسپانیا د دغې ویروس تر سخت برید لاندې راغلل.

پوره دری میاشتې وروسته اروپا مېشتې اسپانیا په لومړي ځل د کرونا له امله ۲۴ ساعتونه بې مړینې تجربه کړل او پرون د دوشنبې شپه او ورځ کې یې د کرونا له امله هېڅ مړینه نه درلوده.

د کرونا وبا له ایران څخه وروسته په ایتالیا او اسپانیا باندې تر ټولو سختې ورځې راوستلې چې د مارچ میاشت د دغو هېوادونو لپاره د دوی په معاصر تاریخ کې د وبا له امله تر ټولو خونړۍ او ځوروونکې میاشت وه.

که څه هم په امریکا او یو شمېر آسیایي هېوادونو کې د کرونا وبا اوس هم په ډېره چتکۍ د خپرېدو په حال کې ده، خو په اروپا کې تقریباً د ټولو هېوادونو لخوا مهاره شوې ده او اوس په تدریجي ډول د کمېدو په حال کې ده.

ایټالیا هم څو ورځې وړاندې کرونا ته د ماتې ورکولو هوایي مانورې ترسره او د خوښۍ جشن یې ونمانځه. بریتانیا، فرانسه او جرمني کې هم د کرونا مثبتې پېښې او مړینې د کمېدو په حال کې دي خو هخوا امریکا بیا د کرونا وبا سختې شپې او ورځې تېروي. په دې وروستیو کې په امریکا کې د یوه تور پوستي د وژلو له امله لاریونونه هم به تاوتریخوالي اوښتي دي او ګڼ کسان په کې ټپیان شوي خو د مړینې خبر نه در ورکړل شوی.

دلته د آسیا په کچه هم د افغانستان او پاکستان په ګډون یو شمېر هېوادونو د کرونا تر سخت برید لاندې دي. که څه هم د دغې وبا خپرېدل لا هم په چټکۍ روان دی، خو د ګڼو هېوادونو له خوا په ګرځبندیز کې آسانتیاوې را وستل شوې دي چې دې چارې د ویروس له خپرېدو سره هم مرسته کړې ده.

د اسپانیا روغتیایي چارواکو ویلي دي چې پرون دوشنبه په تول هېواد کې د کرونا سله امله هېڅ مړینه ثبت شوې نه ده خو یوازې د کرونا ۷۱ نورې مثبتې پېښې ثبت شوې دي چې دا د تېرو دریو میاشتو په پرتله د پام وړ کموالی ښیي.

په اسپانیا کې د کرونا له امله د مړوشمېر تر ۲۷ پورته دی خو د فراندو سیمون په نوم د دغه هېواد یوه روغتیایي چارواکي رسنیو ته وویل چې د کرونا وبا ماتولو ته خوشبینۍ زیاتې شوې دي او تمه ده په نیږدې راتلونکي یې یې ګیلم ور ټول شي.

اسپانیا د کرونا د مهار کولو لپاره په خپلو وګړو باندې تر ټولو سخت شرایط وضع کړي وو چې له همدې امله وتوانېدل کرونا په خپل هېواد کې قابو کړي.