مشهور هندي اداکار سوشات سینګ ځان وژنه کړې ده

خبریال وېب پاڼه/د هندي رسنیو د راپور له مخې د بالیووډ سینما مشهور او ځوان اداکار سوشانت سینګ راجپوټ نن یکشنبې په خپل کور کې ځان وژنه کړې ده.

هندوستان ټایمز ورځپاڼې د بالیووډ سینما د وتلي او ځوان ستوري سوشانت سینګ راجپوټ د مړینې خبر تائید کړی دی او زیاتوي چې نوموړي نن یکشنبه د هندوستان په ممبیي ښار کې په خپل کور کې ځان وژنه کړې ده.

تر اوسه د نوموړي د ځان وژنې څرنګوالی په ډاګه شوی نه دی خو دا په تېره څه د پاسه یوه میاشت کې د هندي سینما د دریم مشهور ستوری دی چې مړینه یې د مینوالو زړونه ماتوي.

سوشانت سینګ په ګڼو فلمونو کې کار کړی ؤ او وروستی فلم یې په ۲۰۱۹ ز کال کې د چیچور په نوم خپور شو.

دغه ۳۴ کلن اداکار داسې مهال ځان وژنه کوي چې لا د بالیووډ سینما مینوالو د ریشي کپور او عرفان خان د مړینې غم ژړلو او ژور خپګانونه یې پرې څرګندول.

تر اوسه د نوموړي د ځان وژنې څرګند دلیل معلوم شوی نه دی خو په ممبیي کې د پولیسو لخوا څېړنې پیل شوې دي.

ویکیپیډیا یې په پېژندنه کې وایي چې نوموړی یو فوټبالېست ؤ او په ۲۰۰۸ ز کال کې د هند سینما ته راغی چې په رومانټیکو او ورته فلمونو کې یې کار کار کړی ؤ. له آمرخان سره په PK فلم کې د ښه لوبېدو له امله یې جایزه هم ترلاسه کړې وه.

یو ناپي مین، پي کې، ډوني، رابطه، کدارنات، کای پوجي او رانندګي یې مشهور فلمونه بلل کېږي.

نوموړی په ۲۰۱۶ ز کال کې له خپلې ملګرې آنکیتا لوکانده څخه وروسته له شپږ کلنې اړیکې جلا شو. سوشانت په خپل ورستي فلم کې له شاردا کپور سره کار کړی ؤ چې د رومانس له امه په بلاکبسټر فلمونو کې هم حساب شو.

د سوشانت په مړینو د هنر او سپورټ ډګر ګڼو ستورو خواشیني څرګنده کړې ده او دا یې یو حیروانوونکی خبر بللی دی.