The news is by your side.

جاپان کې يو روبوټ غواړي چې ښاروال شي

د ټېکنالوژۍ او روبوټونو د هېواد څخه تازه خبر دا راغلى دى، چې په دغه هېواد کې يو مصنوعي ذهن لرونکى روبوټ غواړي چې ښاروال شي او په دې لړ کې يې د ښاروالۍ ټاکنو ته د ځان کانديدولو پرېکړه کړې ده.

په نړۍ کې دا بحث روان دى، چې د مصنوعي ذهن روبوټ د انسانانو ځاى نيسي او له دې سره به په انسانانو کې بېروزګاري زياته شي، خو ايا دا د حېرانتيا وړ خبره نه ده، چې د مصنوعي ذهن درلودونکي يو ماشين د ښاروالۍ ټاکنو ته ځان کانديد کړى دى؟

که څه هم تراوسه پورې په نړۍ کې د مصنوعي ذهن لرونکو روبوټونو ته د لوړو عهدو ورکولو په اړه څه قانون وجود نه لري، خو د ټوکيو په ټاما سيټي کې د ښاروالۍ ټاکنو ته يو روبوټ کانديد شوى دى.

د خوند خبره دا ده، چې ښار کې ځاى پر ځاى د دې روبوټ انځورونه لګېدلي دي، خو بلخوا يو شمېر خلک وايي، چې دا د ميشي هيټو ماتسوډا يو دوکه ده، چې غواړي ښاروال شي، نو په دې لړ کې يې يو روبوټ ښاروالۍ ته وړاندې کړى دى او د هغې تر شا به په خپله کار کوي.

خو د دې هر څه معلومات به وروسته وشي، چې د دغه ځاى خلک يو انسان ته رايه ورکوي او که يو روبوټ ته رايه ورکوي.