The news is by your side.

په (زيرو) فلم کې يواځې پر شاه رخ ٧٠ کروړه مصرف شوى

د هند سينما د نوموتي ستوري او د هندي فلمونو پاچا شاه رخ خان نوى فلم د ((زيرو)) په نوم راروان دى، چې په دې فلم کې د شاه رخ خان د وړوکي يا ورکوټي قد ښودلو لپاره اويا کروړه هندي کلدارې مصرف شوى دى.

د شاه رخ خان دا نوى فلم د ريکارډنګ په وروستۍ برخه کې دى او شاه رخ خان په لومړي ځل په فلم کې د ورکوټي قد انسان رول ترسره کړى دى.

د دې فلم ډېره برخه په امريکا کې ثبت شوې ده، چې شاه رخ خان له ډېر وخت راهيسې په امريکا کې د فلم په ثبتولو کې بوخت دى.

په دې فلم کې د شاه رخ خان د قد ورکوټي کولو لپاره د شاه رخ خان پروډکشن ((ريډ چلي انټرټينمنټ)) په ويژول ايفيکټس باندې ٧٠ کروړه هندي روپۍ مصرف کړي دي او د دې فلم په ويژول ايفيکټس باندې څلور سوه تنه کار کوي.

دا د ((باهو بلي)) څخه وروسته دوهم فلم دى، چې په ويژول ايفيکټس باندې يې دومره ډېرې پېسې مصرفېږي، د باهو بلي فلم په ويژول ايفيکټس بيا ٨٥ کروړه هندي کلدارې مصرف شوې وې.

شاه رخ خان د خپل دې فلم په تړاو ويلي دي، چې د دې فلم ويژول ايفيکټس نه يواځې په هند، بلکې په ټوله نړۍ کې ډېر پرمختللى دى او دا چې د دې فلم ويژول ايفيکټس دوه کاله مخکې ډيزاين شوي و.

ياده دې وي چې په ((زيرو)) فلم کې له شاه رخ خان سره انوشکا شرما او کترينه کېف هم کار کوي. دا فلم به د ٢٠١٨ کال د دسمبر په ٢١مه نېټه نندارې ته وړاندې شي.