The news is by your side.

په خارجه وزارت کې د (من افغان نیستم) شبکې رسوا کیدل

ليکوال : عبدالقیوم رووفي

د افغانستان د خارجه چارو وزارت تیره اوونۍ د لا زیاتې رسوایۍ د مخنیوي او د عامه ذهنیت د غولولو په خاطر په دې وزارت کې د انټرنېټ په کارولو بندیز ولګاوه.

خارجه وزارت په ډېرې وارخطایۍ دا پریکړه هغه وخت وکړه چې په دې وزارت کې د (من افغان نیستم) متعصبه ډله افشا شوه او د افغانستان د حکومت کشفي ارګانونه پرې خبر شول.

ویل کیږي په خارجه وزارت کې د دې ډول انټرنيټي شبکې د ایجاد هدایت یو کال مخکې د دې وزارت سرپرست وزیر صلاح الدین رباني ورکړی و او هغه وخت يې چارې په مستقیم ډول د وزارت اداري معین نصیر احمد اندیشه، په خارج کې د ځینو سفارتونو په مرسته پرمخ وړلې، خو په وروستیو کې چې دا موضوعات تاوده شول دا شبکه پراخه شوه او چارې يې د اندیشه تر نظر لاندې د خارجه وزارت د فرهنګي بخش رییس توریالي غیاثي او د رباني او اندیشه خاصې استازې فریبا نوابي ته وسپارل شوې.

د (من افغان نیستم) فاشیستي ډلې غړي زیات شول د اداري معین د دفتر په غړو او د وزارت د ځینو کارکوونکو علاوه له خارجه وزارت څخه بهر څو متعصب کسان هم پکې شامل شول، خو چارې به يې د خارجه وزارت د فرهنګي ریاست له خوا پر مخ وړل کیدلې.

دغې ډلې په اوونۍ کی دوه ځله د فرهنګ د پنجشیري ریيس توریالي غیاثي په دفتر کی غونډې کولې، همدلته به يې د خپرېدو وړ موضوعات تصویب او تاییدول، بیا به يې د دغې شبکې نورو غړو ته استول. د شبکې زیاتره برخې هغه وخت هم په خارج کې د افغانستان په سفارتونو کې وې.

د (من افغان نیستم) فاشیستي شبکې د رهبرۍ شورا د غونډو پرېکړې به په خارج کې د افغان سفارتونو متعصبو کارمندانو ته د فریبا نوابي له خوا او په کابل کې له خارجه وزارت د باندې د فیسبوک متعصبو کارونکو او د رسنیو کارکوونکو ته د ماندګار ورځپاڼې د مسول مدیر نظري پریاني او د یک تلویزیون د یوه کارکونکي له خوا په مستعار نوم انتقالیدلې.

په خارج او داخل کې به د شبکې غړو په منظم ډول په فیسبوک کې خپرولې او تلویزیونونو کې به يې پروګرامونه او ګردي میزونه جوړول.

کله چې په خارجه وزارت کې د دغې متعصبې ډلې رهبري افشا شوه، نو وزارت نه یوازې په دې وزارت کې د انټرنېټ کارول بند کړل، بلکې د شبکې زیاتره چارې يې په خارج کې د افغانستان سفارتونو ته چې ډیری او په ځینو سفارتو کې ټول کارکوونکي يې د یوې ډلې او یوې سیمې دي، ولیږدول شوې.

اوس د (من افغان نیستم) فاشیستي ډلې زیاتره کارونه په سفارتونو کې کیږي، خو رهبري يې اوس هم د وزارت له فرهنګي ريیس توریالي غیاثي سره ده، چې په مستعار نوم د دې متعصبې شبکې چارې په مخ وړي او په منظم ډول صلاح الدین رباني او نصیر احمد اندیشه ته راپور ورکوي.