خوست کې د میلو ځایونه غصب شوي دي 

خبریال ویب پاڼه / خوست کې د دولتي باغونو ځمکې غصب شوې دي د خوست ولایت د کرنې او مالدارۍ رییس حفیظ الله شاه نوري وایي  له تېرو څو کلونو راهیسې په دې ولایت کې د فارم په نوم د هغه دولتي باغ ځمکې د خلکو لخوا غصب شوې، چې خلکو به د مېلو لپاره ترې استفاده کوله.

په خوست ښار کې د فارم په نوم دولتي باغ  اوس یې ډېری برخې د سیمې د خلکو لخوا غصب شوې دي.

د خوست ولایت د کرنې او مالدارۍ ریاست مسولین وایي په دې ولایت کې اوه لوی دولتي باغونه شته، چې له ډېر پخوا راهیسې به ترې د مېلو لپاره استفاده کېدله؛ خو زیاتوي چې له تېرو څو کلونو راهیسې یې په دې ولایت کې د فارم باغ زیاتې برخې د سیمې خلکو لخوا غصب شوې او لا هم دا چاره دوام لري.

د دغه  مسولینو په خبره د یاد باغ د غصب شویو ځمکو په تړاو یې لسګونه کسان څارنوالي ته هم معرفي کړي.

په ورته وخت کې د خوست اوسیدونکي وایي په دې ولایت کې د تفریح او ساعتیري لپاره یوازیني همدا دولتي باغونه دي، چې دوی ترې د پارکونو په توګه استفاده کوي؛ خو دوی وایي د ولایتي ادارې د نه پاملرنې له امله پکې جوړې شوي  پخوانۍ وداني ویجاړې شوې او د بیرته رغولو لپاره یې  هیڅ کوم ګام ندی اخیستل شوی؛ اوس دوی په خپله لاس په کار شوي او په دې باغ کې د نیالګیو د کینولو لپاره له خلکو مرستې غوښتنه کوي چې دغه ځمکې  بیرته زرغونې کړي.

خوست یو له هغو ولایتونو دی، چې ډېری دولتي ځمکې پکې د زورواکو او خلکو لخوا غصب شوې دي. د دې ښار د اوسیدونکو یوه بله نیوکه دا هم ده، چې زیاتې دولتي ځمکې یې د ولایتي ادارې لخوا په اوږد مهاله قراردادونو ځینې کسانو ته ورکړل شوې، چې په خبره یې دا چاره هم د دولتي ځمکو غصب لپاره لاره هواروي.

خوست یوازینی ولایت ندی چې دې ستونزې سره لاس او ګیروان دی بلکې په یو شمیر ولایتونو کې  د زورواکو او اوسیدونکو لخوا ځمکې غصب کیږي

داپه داسې مهال ده چې په دې وروستیو کې ولسمشر غني د ځمکې د غصب د مخنیوي لپاره جدي لارښونه کړي ده.

که څه هم افغان ولسمشر بیا بیا د ځمکو د قبضو مسله سره کرښه بللې ده خو دلته هم د نورو سرو کرښو په څېر تر دغه سره کرښه اوښتی او خلک او زورواکي‌په آزاد لاس د ځمکو قبضه کولو ته دوام ورکوي .