ټرمپ ساه اخیستنې کې ستونزه لري پوځي روغتون ته انتقال شوی

خبریال وېب پاڼه/ د امریکا د متحده ایالاتو ولسمشر ډونالډ ټرمپ چې پر کووېډ١٩ ناروغۍ اخته شوی روغتیایي وضعیت یې ښه نه دی ښودل شوی.

د ټرمپ یو مشاور ویلي، ولسمشر په تنفسي برخه کې ستونزه لري او په سخته ساه اخلي.

د ډونالډ ټرمپ او مېرمنې یې په کووېډ١٩ ناروغۍ اخته کېدو سره سپینې ماڼۍ د ولسمشر ټرمپ روغتیایي وضعیت ډېر ښه بللی وو، خو سي اېن اېن بیا د ولسمشر ټاکنیز سلاکار له خولې راپور ورکړی چې ټرمپ د سه اخیستنې او اېستنې برخه کې ستونزه لري او دا مهال په روغتون کې دی.

ډونالډ ټرمپ د کرونا ویروس نه د درملنې په موخه پرون جمعه پوځي روغتون ته انتقال شوی، ویل کیږي د ټرمپ په ډله کې یو لویه برخه په کرونا ویروس اخته شوې او دې خبرې پر کرونا ویروس د لوړ پوړو چارواکو د اخته کېدو وېره پیدا کړې.

ټرمپ او مېرمن یې پر کووېډ١٩ ناروغۍ اخته شوي

د امریکا ولسمشر ډونالډ ټرمپ او مېرمن یې میلانیا ټرمپ د کرونا ټېسټ د جمعې په ورځ مثبت راووت.

دا په داسې مهال ده چې ډونالډ ټرمپ د ماسک اچولو په تړاو پر خپل ټاکنیز سیال جوبایډن هم ملنډې وهلې وې، خو اوس خپله هم پر کرونا ویروس ککړ شو.

اوس مهال په امریکا کې د کووېډ١٩ ناروغۍ مثبتې پېښې د نړۍ د نورو هېوادونو په پرتله خورا ډېرې لوړې دي او د مړینو شمېر یې هم ورځ تر بلې زیاتیږي.

امریکا کې له اووه میلیونو ډېر کسان پر دې ناروغۍ اخته دي او زرګونو تنو یې خپل ژوند له لاسه ورکړی، د ټرمپ پر حکومت نیوکې دي چې ویې نه شول کولی پر خپل وخت له دې ناروغۍ د مخنیوي لپاره اقدام وکړي.

څو ورځې وړاندې د امریکا د ولسمشر ډونالډ ټرمپ او ولسمشریزو ټاکنو ته نوماند جوبایډن ترمنځ مناظره هم وشوه چې یوه برخه کې د کرونا ویروس په اړه بحث وو.

جوبایډن د کرونا ویروس د مدیریت په برخه کې پر ټرمپ او ادارې یې نیوکه وکړه او د دوی مدیریت یې پر کم کارۍ تورن کړ چې دوه لکه امریکایان مړه شول، خو ټرمپ وویل که دا د جوبایډن اداره وی اوس به دوه میلیون امریکایان مړه شوي وو.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More