خلیلزاد: د طالب بندیانو د خوشي کولو لړۍ دې پیل شي

خبریال ډاټ کام/د افغان سمولې لپاره د اریکا د بهرنیو چارو وزارت ځانګړي استازي زلمي خلیلزاد په خپل یوه تازه ټویټ کې کاږي چې افغان حکومت دې د طالب بندیانو لړۍ پیل کړي.

نوموړی وروسته له هغه دا خبره کوي چې افغان چارواکي د کورونا ویروس د له منځه وړلو او د هېوادوالو اندېښنو ته د لاسرسي په هڅه کې دي. بل پلو د افغان حکومت او پخواني اجرایه رییس تر منځ د ټاکنو پر سر جوړه شوې خلا هم ډکه شوې نه ده. ښاغلي خلیلزاد په خپلو تازه ټویټونو کې ویلي دي چې د دې وخت را رسېدلی چې افغان سیاستوال خپلې سیاسي ناندرۍ پای ته ورسوي او په یو توافق باندې سره همغږي شي.

دا په داسې حال کې ده چې د ټاکنو خپلواک کمیسیون د ټاکنو په وروستیو پایلو کې ښاغلي محمد اشرف غني ګټونکی اعلان کړ خو پخوانی اجرایه رییس او د ولسمشر سیال نوماند ډاکتر عبدالله مدعي شو چې د ټاکنو پایلې ورته د منلو نه دي او دی خپله د افغانانو د پاکو رایو ګټونکی ولسمشر دی. نوموړي له ښاغلي اشرف غني سره هم مهاله په سپېدار ماڼۍ کې د لوړې مراسم ترسره کړل او ځان یې د افغانستان ولسمشر اعلان کړ.

د لوړې له مراسمو وړاندې هم ښاغلي خلیلزاد د ولسمشر غني او پخواني اجرایه رییس تر منځ د جوړجاړي هڅې وکړې خو و نه توانېد چې دوی دواړه د لوړې نه وړاندې یو سیاسي توافق ته سره ورسوي. نوموړی په خپل تازه ټویټ کې زیاتوي چې د د ټاکنو پر سر را منځته شوی کړکیچ د افغانانو امنیت زیانمنوي او د دې تر څنګ کورونا ویورس د عامو افغانانو ژوند ګواښي نو په کار ده چې د خپلو خلکو ژوند ته لومړیتوب ورکړي ځکه په خبره یې دا د ژوند او مرګ خبره ده.

پتېیل شوې وه چې محمد اشرف غني به د لوړې له مراسمو وروسته د طالب بندیانو د خوشي کولو لړۍ او دغه راز د بین الافغاني مذاکراتي ټیم لپاره له سیاسي، مدني او حکومتي کسانو څخه یو نوملړ چمتو کوي خو لا هم دغه چارې ترسره شوې نه دي.

که څه هم د امریکا او طالب وسلوالو تر منځ د سولې په هوکړه لیک کې د ۵۰۰۰ طالب اورپکو خوشي کول آساسي شرط ؤ خو لا هم حکومت نه دی توانېدلی چې د دغو بندیانو د خوشي کولو بهیر پیل کړي. په ښکاره افغان حکومت په دې هکله کوم ځانګړی غبرګون نه دی ښودلی خو یو شمېر سیاسي شنونکي حکومت د کورونا ویروس د خپرېدو پر وړاندې مبارزې ته پر چمتووالي باندې مصروف ښیي.

ښاغلي زلمي خلیلزاد په افغان حکومت غږ کړی چې ژر تر ژره دې د طالب بندیانو د خوشي کولو لړۍ پیل کړي تر څو وکولی شي د سولې را روان مذاکرات جاري وساتل شي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More