حکمتیار نږدې ورځو کې په رسمي سفر پاکستان ته ځي

خبریال وېب پاڼه/ د افغانستان په چارو کې د پاکستان ځانګړی استازی محمد صادق خان وایي، د افغانستان د حزب اسلامي ګوند مشر ګلبدین حکمتیار به په نږدې ورځو کې د پاکستان حکومت په رسمي بلنه اسلام اباد ته سفر وکړي.

ښاغلي صادق خان په خپله ټوېټر پاڼه لیکلي چې حکمتیار به روانه اوونۍ د دوشنبې یا سې شنبې په ورځ پاکستان کې وي او د پاکستان له بهرنیو چارو وزیر، د پاکستان له ولسمشر، د سنا مجلس رییس او ملي شورا له رییس سره وګوري.

نوموړي وړاندې زیاته کړې چې حکمتیار به د پاکستان مطالعاتو مرکز کې وینا وکړي.

حکمتیار ته نزدې سرچینو هم پاکستان ته د نوموړي سفر تأیید کړی او وایي چې حکمتیار د پاکستان حکومت په رسمي بلنه ورځي او هلته به له پاکستانیو چارواکو سره وګوري او د افغان سولې پر پروسې به بحث وکړي.

له افغان حکومت سره د حکمتیار د سولې هوکړې وروسته دا دویم رسمي سفر دی چې پاکستان ته یې کوي، اوس مهال جهادي مشر او د حزب اسلامي ګوند مشر ګلبدین حکمتیار د افغانستان په حکومت کې هېڅ رسمي ونډه نه لري.

ګلبدین حکمتیار له هغه جهادي مشرانو دی چې پر افغانستان د شوروي اتحاد د یرغل پر مهال یې له پاکستان سره نزدې اړیکې درلودې، حکمتیار په ١٩٨٠ز کال کې د شوروي اتحاد پر ضد او ١٩٩٠ز کال کې د اسلامي حکومت پر ضد په کابل کې سختې جګړې وکړي او د خپلو جګړو په پایله کې یې د واک لپاره په زرګونه بې ګناه افغانان شهیدان کړل.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More