د طالبانو له لوري د تبليغاتي جګړې زور، د حکومت لويې نيمګړتياوې
خبريال ویبپاڼه: په دې وروستيو کې چې د افغانستان څخه بهرني ځواکونه په وتلو دي د روان وضعیت څخه طالبان د هر اړخیزې ګټې پورته کولو هڅه کوي.
لکه څنګه چې ټول پوهېږو چې تبلیغاتي جګړه د عملي جګړې غوندې مهمه ده، عملي ملاتړ د ذهني ملاتړ دوهمه مرحله ده، له همدې کبله د جګړې هر لوری د ذهنونو د ترلاسه کولو لپاره د اذهانو د نه تخريب لپاره پراخه تبليغاتي پاليسي او تګلاره لري.
که څه هم طالبان د امکاناتو په کچه د يو حکومت غوندې امکانات نلري خو په تبليغاتي جګړه کې بيا هم ډېر فعال دي، دوی د محدودو امکاناتو په درلودلو سره په تبليغاتو کې تر نورو یو قدم وړاندې دي.
د افغانستان څخه د امريکايي ځواکونو د وتلو په مهال د طالبانو د تبليغاتي جګړې شدت د عملي جګړې د شدت سره یو ځای پيل شو.
په دې موده کې دوی د یوې خوا د حکومت ناکامۍ او بې کفایتي هدف ګرځوي او د بل لوري بيا په لوی لاس د حکومت هغه لږ خدماتي قابليت هم له منځه وړي او وروسته د حکومت دا نيمګړتياوې پخپله ګټه کاروي او يو ډول د ځان د راتګ لپاره ذهن سازي کوي.
د طالبانو د تبلیغاتو د بريا رازونه کېدی شي بېلابېل وي، که د طالبانو له ښه او بد څخه تېر شو نو ويلی شو چې طالبان تر يو ځايه پخپلو ژمنو ودري، له همدې کبله يې خبره وزن لري.
د بل لوري د طالبانو خبره يوه ده او سرچینه یې هم يوه ده، د یو يا دوه وياندویانو له لوري لومړي مالومات خپرېږي او بيا په منظم ډول د نورو رسنیو له لارې نشر کیږي.
د حکومت طرف ته موجودې ستونزې
په تبليغاتي جګړه کې د حکومت په طرف کې ځینې وختونه داسې ليدل کېږي چې د واقعيت څخه زياته فاصله شتون لري، حداقل د حقيقت يوه برخه بايد د تبلیغاتو په بدنه کې شتون ولري.
په دوهم قدم کې بې وزن نيوکې او تبليغات، تکرار نیوکې، تکرار پوښتنې، د استدلال څخه خالي څرګندونې ددې سبب کېژی چې په ټولنه کې د ځينې حکومتي وياندویانو څرګندونې خپل وزن له لاسه ورکړي.
د بل لوري هغه وياندویان چې ملت يې پیژني چې یوه ناسمه تاریخچه لري، يا تعصبي تاريخچه لري، همدا اوس يې دریځ د تعصب ډک دی په خلکو کې خپل ارزښت او باور له لاسه ورکوي.