“د سولې روانو خبرو د افغانانو لپاره هېڅ ګټه نه ده “

خبریال وېبپاڼه/ په کابل کې د امریکا پخواني سفیر راین کراکر په خپله یوه تازه مرکه کې ویلي طالبان پر سوله باوري نه دي او د لا ډېرو سیمو نیولو ته لېواله ده او د همدې لپاره خو یې جګړو ته هم زور ورکړی دی.

راین کراکر وایي د سولې روانو خبرو او لړۍ د افغانستان لپاره هېڅ راز ګټه نه ده لرلې او د جګړو د کمېدو سبب نه ده شوې چې دا وضعیت ټولو ته د اندېښنې وړ ګرځېدلی دی.
نوموړی وایي که پر سوله تمرکز و نه شي او افغانان خپلې ستونزې د خبرو له لارې حل نه کړي نو په دغه هېواد کې د کورنیو جګړو د دوام خطر شته دی او دا احتمال شته چې وضعیت نور هم ترینګلی شي.
هغه زیاته کړې چې د افغانستان روانه جګړه به یوازې په دې هېواد کې پاتې نه شي بلکې ګاونډي هېوادونه به هم زیانمن کړي له همدې امله د ټولې سیمې هېوادونو ته په کار ده چې سولې ته د رسېدو په برخه کې له ټولو اړخونو سره همکاري وکړي.
کراکر داسې مهال دغه څرګندونې کوي چې دمګړی د افغان لورو ترمنځ مذاکرات په ټپه ولاړ دي خو جګړې شدیدې شوې دي او هره ورځ لسګونه ملکي وګړو او عامو افغانانو ته پکې مرګ ژوبله اوړي.
د امریکا پخوانی سفیر داسې مهال د طالبانو د نیت په اړه دا خبرې کوي چې دغې ډلې په ټول هېواد کې د جګړې اور ګرم ساتلی دی او هره ورځ لسګونه کسانو ته مرګ ژوبله اړوي.
دغه وضعیت د عامو افغانانو اندېښنې را پارولې دي او د خپل ځان او هېواد د برخلیک په اړه ډول ډول پوښتنې ورسره پیدا دي.
د شنونکو په باور، طالبان لا هم د نظامي قوت له لارې د جګړې د ګټو په فکر کې دي، ځکه خو یې دغه وضعیت ته دوام ورکړی دی.