د اردوغان اصلي هدف او موخه څه ده؟
خبريال وېبپاڼه: په دې وروستيو کې د ترکیې د حکومت له لوري په ځانګړي ډول ددې هېواد د حاکم ګوند د مشر او ولسمشر رجب طیب اردوغان لخوا د افغانستان په مسايلو کې دلچسپي زياته شوې ده.
ترکيې په کابل کې د کابل هوايي ډګر د پخوا راهيسې ساته، کله چې امریکا او ناټو اعلان وکړ چې دوی به د سېپټمبر تر یوولسمې وړاندې د افغانستان څخه خپل ټول ځواکونه وباسي نو د ترکیې له لوري افغان حکومت او نړيوالو ته په ځانګړي ډول د امریکا متحده ایالاتو ته وړانديز وشو چې دوی د ځينو شرطونو د منلو په صورت کې تيار دي د کابل د هوايي ډګر د ساتنې چارې ته دوام ورکړي.
اردوغان په افغانستان کې کومې موخې تعقيبوي؟
د ترکیې حکومت د کابل د هوايي ډګر د ساتنې په برخه کې د امریکا څخه خپل مطالب او په افغانستان کې دننه ځینې نور ځانګړي هدفونه لري.
په منځني ختیځ او مديترانه کې د وروستیو بدلونونو او پېښو وروسته د ترکیې او د امریکا د متحده ايالاتو ترمنځ اړيکې په بې ساري ډول کړکېچنې شوې دي، ددې کړکېچونو په پايله کې د ترکیې اقتصاد بې سابقې زيان ليدلی دی او دې کار په ترکیه کې د رجب طیب اردوغان محبوبیت را کم کړی دی.
د امريکا سره د دغړو وهلو په پايله کې د ترکيې ليره په بې ساري ډول بې ارزښته شوه، په ۲۰۱۵ م کال کې يو ډالر دوه ليرې او څو پوله و، خو اوس په ۲۰۲۱ م کال کې يو ډالر د ۸ لیرو څخه پورته دی.
د امریکا سره د اړیکو خرابوالي د ترکیې اقتصاد په شديد ډول کم زوری کړ او ترکیه نور د امريکا سره د دغړو په ځای د ګډو موخو او ګټو په لټه کې ده.
ترکيه غواړي په افغانستان کې د امريکا سره د همکارۍ په پايله کې د امريکا سره خپلې اړیکې بېرته ښې کړي او د ليرې ارزښت له نورې خرابۍ څخه وژغوري، ددې ترڅنګ په کور دننه هم اردوغان غواړي چې د محافظه کار او ملت پالو رایې ترلاسه کړي.
د اردوغان ډله او مېډيا ملت پالو ته وايي چې په افغانستان کې ددوی د قوم خلک يانې ازبکان ژغوري د هغوی د قتل عام او منزوي کېدو مخنیوی کوي او د بل لوري بيا محافظه کاره طبقې ته په خطاب کې وايي چې د مسلمان ورور هېواد افغانستان د بدې ورځې ملګری دی، ترکيه ددې امت مشري په غاړه لري او د مسلمانانو لاس نيسي، په دې ډول اردوغان غواړي ددې دوو طبقو رايې او ملاتړ ترلاسه کړي.