کابل کې د ژمي په ورو ورو راتګ سره هوا بیا ککړه شوې

خبریال وېب پاڼه/ کابل کې د هوا په سړېدو او د ژمي په ورو ورو راتګ سره یو ځل بیا هوا ککړه شوې ده.

هر کال د ژمي په راتلو سره د کابل ښار هوا څو برابره ککړیږي او ان د ککړو ښارونو په لېست کې په سر کې ځای لري.

د هوا په ککړېدو سره کابل ښاریان له روغتیایي ننګونو سره مخ وي او نه شي کولی د خپلې درملنې لګښتونه پرې کړي، همدا راز د ژوند د چاپېریال ککړتیا د خلکو پر رواني حالت بده اغېزه لري، د هوا ککړتیا او د ژوند د چاپېریال ککړتیا د بېلا بېلو را پیدا کېدونکو ناروغیو له امله په زیاته کچه د ډېر عمر کسان مړه کیږي.

ور سره هم مهاله د هوا ککړتیا او د فضا د خړوالي له کبله ټرافیکي پېښې هم زیاتیږي او لا ډېرې نورې ستونزې زېږوي چې له جګړې وروسته د افغانانو د مړه کېدو یو لامل د هوا ککړتیا هم ده.

کابل کې تېر کال هم د نړۍ په کچه د ککړو هېوادونو په لېست کې په اول ځای وو او سږ کال بیا د سړو په را لګېدو سره د کابل ښار هوا ککړه شوې، چې ممکن په سخت ژمي کې دا ککړتیا نوره هم هم زیاته شي.

حکومت تر اوسه د هوا د ککړتیا د مخنیوي لپاره څه نه دي ویلي او نه یې هم ورته د اقداماتو په نیولو خبر ورکړی، خو تېر کال یې د ککړتیا د کچې په ټیټولو کې له کابل ښاریانو مرسته غوښتې وه چې له سون توکو او هغه شیانو له سوځولو ډډه وکړي چې هوا ککړوي.