د کندهار ټولې لویې لارې وتړل شوې

خبریال وېب پاڼه/ کندهار ښار چې د هېواد په کچه له نورو ولایتونو سره د سوداګریزې راکړې ورکړي په برخه کې مرکزي رول لري، چارواکو یې د کرونا د مخنيوي په خاطر د ټولو لویو لارو د تړلو امر کړی دی.

په دغو لویو لارو کې د کندهار- کابل او کندهار – هرات لویې لارې هم شاملې دي.

د دغو لویو لارو تر څنګ په کندهار ښار کې د خوراکي توکو له پلورنځيو او درملتونونو پرته نور ټول ښار تړل شوی.

د کندهار والي حیات الله حیات د دغه ښار اوسېدونکو ته سپارښتنه کړې چې له اړینو کارونو پرته دې په ښار کې تګ راتګ کم کړي.

اوس دغه لوی ښار کې د تېر خلاف یوازې د خوراکي توکو پر هټيو او پلورنځيو ګڼه ګوڼه ليدل کېږي.

دغو هټیو کې د خوراکي توکو قیمتونه له یوې ورځې څخه بلې ورځې ته لوړ شوي دي.

د کندهار ښار اوسېدونکي د حکومت له لوري د کرونا ویروس د مخنيوي لپاره اوسني تدابیر کم ګڼي او د زیاتېدو غوښته یې کوي.

کرونا وېروس چې د نړۍ په ۱۹۰ هېوادونو کې په چټکۍ سره د خپرېدو په حال کې دی، افغانستان کې يې هم د په هر ۲۴ ساعتونو په اوږدو کې نوې مثبتې پیښې مخ پر ریاتیدو دي.

دا مهال د کابل په ګډون په ۱۵ ولایتونو کې د کرونا ویروس ١١٧ مثبت پېښې ثبت شوې دي؛ د دغو پېښو تر ټولې ډېرې ٨١ په هرات کې ثبت شوې دي.

عامې روغیتا وزارت د کرونا ویروس د مخنیوي لپاره د کابل ښار سوخته پله لاندې ټول په نشه یي توکو روږدې کسان راټول کړل
د کابل ښار اوسیدونکي وايي چې د کرونا ویروس د مخنیوي لپاره ښه ګام دي خو له حکومت څخه غوښتنه لري چې باید د نشه يي توکو پر وړاندې مبارزه وکړي.

په ورته وخت کې بیا پاکستان اعلان کړی چې د کرونا ویروس د مخنیوي لپاره د دې هېواد پولې د ګاونډیو هېوادونو او افغانستان سره د دریو اونیو لپاره تړل شوي پاتې شي.

پاکستاني چارواکو ویلي دي د دې هېواد دوه اونیو پولو تړل کیدو پای سره د دوه نورو اونیو لپاره به هم د دې هېواد پولې به د مسافرو او سوداګریزو توکو لپاره تړل شوې پاتې شي.

بل خوا بیا د دې هېواد چارواکو د ملګرو ملتونو سازمان څخه په دې هېواد کې میشت افغان کډوالو لپاره د بشري مرستو ترلاسه کیدو غوښتنه کړې او په دې برخه کې په پاملرنې باندې ټینګار کړی دی.

پاکستاني چارواکو ویلي دي چې په دې هېواد کې ګرځیدو باندې د محدویت وضع کیدو سره افغان کډوال بیا ډيری بشري مرستو ته اړتیا لري.

اوس مهال په پاکستان کې شاه خوا درې میلیونه افغان ګډوال ژوند کوي.