خوست کې د ضيا ودان لپاره د عدالت لاريون

خبريال وېبپاڼه/ په خوست کې ګڼ شمېر خلکو د ضيا ودان لپاره د عدالت غوښتلو او د هدفي وژنو د غندلو په پار لاريون وکړ.

لاریون والو د ولایت دروازه د اعتراض په توګه وتړله او د مرکزي حکومت څخه یې وغوښتل چې د ضيا ودان شهادت دې داسې نه هېرېږي بلکې د هغه قاتلین دې چې په هر قيمت وي ونيول سي او عدالت دې ورباندې عملي شي.

له طالب او حکومت دواړو غوښتنه

په دې لاريون کې چې د خوست ولايت په مرکز کې ترسره شوی و ګڼو شمېر پښتنو د حکومت ترڅنګ د طالبانو څخه هم غوښتنه وکړه چې په هېواد کې ددې د مدني فعالانو، خبريالانو او خيرخواه خلکو د وژنو ددې لړۍ مخنيوی وکړي او ددوی ژوند دې خوندي کړي.

لاریون کوونکو په داسې حال کې د حکومت ترڅنګ د طالبانو څخه هم د مدني فعالانو د ژوند د خوندي کولو لپاره د جدي پاملرنې غوښتنه کوله چې طالبان حکومت او حکومت طالبان د مدني فعالانو په وژلو تورنوي.

حکومت وايي چې طالبان د مدني فعالانو او نورو مشهورو اشخاصو په وژلو سره غواړي چې حکومت د خلکو د امنیت په ساتلو کې ناکام وښيي او په حکومت باندې د خلکو باور له منځه يوسي.

خو طالبان بيا دا وژنې د حکومت کار بولي، د طالبانو وياندويانو، نېږدې کسانو په مرکو او لیکنو او اعلاميو کې ويلي دي چې حکومت غواړي په ځانګړي ډول کابل ناکراره کړي، مدني فعالان ووژني او د کابل حالت بېړنی وښيي ترڅو نړيوال خپل ټول ځواکونه ونه باسي.

لاریون کوونکو د اوربند غوښتنه وکړه

په خوست کې راټولو شویو خلکو د طالبانو څخه وغوښتل چې د حکومت سره دې هم اوربند وکړي، په داسې حال کې چې طالبانو د امريکايانو سره اوربند کړی نو پکار ده د افغانستان د حکومت سره هم اوربند وکړي.

د پوهانو په اند اوربند کول ترټولو ګټور او اړين کار دی، پوهان وايي په اوسنیو ناوړه شرايطو کې اوربند کولی شي چې حالات د کنټرول خواته بوزي او افغانستان د نسبي ثبات څخه برخمن شي چې په دې ډول د سولې خبرې هم پرمختګ کولی شي او خلک هم بيا د حکومت د ناغېړۍ په صورت کې په حکومت باندې فشار وروړلی شي، خو ددې هرڅه لپاره بايد طالبان اوربند وکړي.

د خپل واک لپاره موږ مه وژنئ!
لاریون کوونکو پخپلو لاسونو کې هغه ليکدړې نيولې وې چې ورباندې ليکلي يې و د خپل واک لپاره موږ مه وژنئ!

خلک په داسې حال کې د واک په خاطر د جګړې طرفونه د خپلو مرګونو قاتلان بولي چې دواړه لوري د قدرت په وېشلو يوې پايلې ته د رسیدو لپاره کار کوي.

د حالاتو څارونکي وايي چې په اوس وخت کې دواړه لوري په خلکو رحم نکوي او د خلکو ژوند ورته ارزښت نلري، ځکه د سولې د خبرو بريا زيات وخت نيسي او دوی په دې جريان کې جګړې ته ادامه ورکوي او په ځانګړي ډول طالبان اوربند ته غاړه نه ږدي.