د غور مېرمنې تالبانو ته:د زده کړو مخنیوی جرم دی، د جرم پر وړاندې چوپتیا سپکاوی دی

خبریال وېبپاڼه: په غور کې سیمه ییزې سرچینو ویلي، چې ددغه ولایت یو شمېر ښځو او نجونو د یوې اعتراضیه غونډې په جوړولو سره، د تالبانو لخوا د ښځو پر زده کړو روان بندیز، یو جنایت وباله.

یادو سرچینو خبریال وېبپاڼې ته ویلي، چې نن د ښځو د نړیوالې ورځې په مناسبت، غور کې د تالبانو والي دفتر مخې ته، ښځو او نجونو یوه اعتراضیه غونډه جوړه کړې وه.

سرچينې خبریال وېبپاڼې ته زیاته کړې، چې لاريونوالو ښځو شعارونه ورکول چې د تعليم منع‌ کول جرم دى؛ د جرم پر وړاندې چوپتيا ذلت دى او (تعليم، کار، ټولنيز عدالت)، زموږ حق دى. تبعیض ته نه وایو، ژوندۍ دې وي برابري!.

د تالبانو لخوا د لګول شويو محدوديتونو له امله د رسنيو لخوا دغه لاریون ته پوښښ نه دى ورکړل شوى.

په ورته وخت کې، د هرات ځايي سرچینو، د دغه ولایت په مرکز کې، د سختو امنیتي تدابیرو خبر ورکړی دی.

د سرچينو په وینا، دغه امنيتي تدبیرونه د ښځو لخوا د مارچ اتمې احتجاجونو مخنيوي لپاره، نيول شوي دي.

دا په داسې حال کې ده چې نن د افغانستان یو شمېر ښارونه، د ښځو د لاریونونو شاهدان ول.

د یادونې وړ ده چې نور کلونه د ښځو نړیواله ورځ په ښه ډول لمانځل کېده او په دغه ورځ د ښځینه وو د ژوند د بهبود لپاره په ډېرو پلانونو کار کېده؛ خو سږ کال ددتالبانو لخوا دغه ورځ ونه لمانځل شوه او نه ښځینه وو ته اجازه ورکړل شوه، چې خپل غږ پورته کړي.