په ساعتېرۍ هم بندېز دی؟
د طالبانو د حکومت د امر باالمعروف وزارت مسوولین له هر هغه څه څخه بد وړي، چې د ځوانانو د ساعتېرۍ لپاره په کارېږي او دوی نه غواړي چې ځوانان یو څو لحظې په ساعتېرۍ کې تېرې کړي.
د کوچني اختر په ورځو کې د طالبانو ستره لاسته راوړنه د ځوانانو څخه د لډو، قطعو یا پرو او نورو داسې شیانو راټولول و، چې ځوانانو د چکر پر مهال له ځان سره وړل.
موږ پوهېږو، چې افغانان له قیماربازۍ سره ډېره علاقه نه لري، دا ټول شیان د ساعتېرۍ لپاره کارول کېږي او باید چې دومره جدي ونه نیول شي، چې خلک پرې وزورول شي.
د طالبانو سرپرست حکومت ته پکار ده چې د ځوانانو لپاره مثبت کارونه وکړي او داسې پروګرامونه جوړ کړي، چې خلک ورسره مصروفه کړي، که یو خوا بېکاري ورځ تر بلې زیاتېږي او بلخوا په داسې کوچنیو کوچنیو شیانو هم بندېزونه لګېږي، نو دا به ځوانانو ته ډېره سخته وي.
همدا لامل دی، چې هره ورځ خبرېږو ډلې ډلې ځوانان ایران او پاکستان ته قاچاقي روان وي، هغه چې ویزې اخلي او دغه هېوادونو ته ځي، هغه بیل دي، دا ځوانان ولې له وطن څخه په تېښته دي؟
په داسې وطن کې به یو ځوان څنګه وخت تېر کړي، چې یو خوا کار روزګار نه وي، بلخوا د ساعتېرۍ په کوچنیو کوچنیو شیانو باندې هم بندیزونه وي او دوی کوچنیو خوشحالیو ته هم نه پرېښودل کېږي.
د طالبانو له سرپرست حکومت څخه مو غوښتنه ده، چې له خلکو سره دې ګزاره وکړي، داسې سختۍ به لوی بحرانونه رامنځته کړي، له وطن څخه چې په کومه چټکۍ ځوان نسل بهر ته روان دی، د کار خلک بهر ته روان دي، دا به په لسیزو کې هم جبران نه شي.
هیله ده، چې چارواکي دا خبرې په بد نیت وانخلي، ځکه زما موخه یوازې د ځوانانو ستونزو ته پاملرنه رااړول دي.
