د کونړ نواپاس کې طالبان او پاکستاني پوځيان یو بل ته ګوته په ماشه دي
د کونړ په نواپاس کې د ډېورنډ فرضي کرښې سره د طالبانو تازه ځواکونه او تجهیزات صفري نقطې ته وررسېدلي دي او همدا راز دغلته شاوخوا خلکو ته هم د کورونو د پرېښودو امر شوی دی.
د طالبانو دا ځواکونه یادې سیمې ته وروسته له هغې ورځي، چې تېره ورځ د پاکستان له خوا د کونړ په سرکاڼو سیمه کې توغندیز بریدونه شوي و، چې خلکو ته یې مالي او ځاني زیانونه اړولي و.
که څه هم په دغه تړاو تراوسه پورې د دواړو خواو څخه څه نه دي ویل شوي، خو داسې ښکاره کېږي، چې په یاده سیمه کې حالت اضطراري دی او د طالبانو د ځواکونو او پاکستاني پوځیانو ترمنځ څه وخت هم نښته کېدای شي.
د یادولو وړ ده، چې په دې وروستیو کې د پاکستان له خوا یو ځل بیا د افغانستان په خاوره بریدونه ډېر شوي دي، څه وخت مخکې پاکستاني الوتکو په ځینو ولسوالیو کې بمبارد هم کړی و.
