په ټرمپ تور ثابت شو، خو نه زنداني کېږي
په امریکا کې هغه محکمې چې د نوي بریالي شوي ولسمشر ډونالډ ټرمپ په اړه پکې د پټو پېسو یوه قضیه روانه وه، نن خپله پرېکړه واوروله.
دغه محکمې ویلي دي، چې ډونالډ ټرمپ باندې تورونه ثابت شوي دي او هغه په دې قضیه کې پړ یعنې مجرم دی. خو دغه محکمې په خپله پرېکړه کې بیا ډونالډ ټرمپ ته کومه سزا نه ده اورولې.
یعنې که څه هم ډونالډ ټرمپ باندې دغه قضیه ثابته شوه، خو نوموړی به نه هم زنداني کېږي او نه به هم کومه جریمه ورکوي.
د یادولو وړ ده، چې ډونالډ ټرمپ د دویم ځل لپاره د امریکا ولسمشریزې ټاکنې ګټلي دي او د جو بایډن له وخت پای ته رسېدو وروسته به یو ځل بیا د امریکا ولسمشر شي.
د یادولو وړ ده، چې که څه هم ډونالډ ټرمپ تراوسه پورې د ولسمشر په توګه لوړه نه ده کړې، خو وروستیو څرګندونو یې سختې ناندرۍ پارولي دي.
هغه که یو خوا د امریکا له خوا طالبانو ته په ورکېدونکو پسې باندې خبرې کړي او د دې د بندولو خبره یې کړې ده، نو بلخوا یې د کاناډا څخه د ۵۱م ایالت جوړولو خبره هم کړې ده او همدا راز دا یې هم ویلي دي چې ګرینلینډ سیمه هم باید په امریکا کې شامله شي، ځکه چې دا د امریکا د ګټو لپاره مهمه ده.
