د ایران د تېلو عایدات په تدریجي ډول کم شوي دي

خبریال وېب پاڼه/د ګاونډي ایران اقتصادي وضعیت په تدریجي توګه پر ځوړ روان دی او په دې وروستیو کې یې د تېلو عایدات هم په کم سارې توګه کم شوي دي.

د ایران د تېلو عایدات له سلو ملیاردو ډالرو څخه آتو ملیاردو ډالرو ته را کم شوي دي او دا په تېرو څو کلونو کې د ایران تر ټولو بد عایداتي کړکېچ بلل کېږي چې د امریکا د ولسمشر ډونالډ ټرمپ لخوا پرې وضع کېږي.

که څه هم کلونه وړاندې کله چې په امریکا کې بارک اوباما د چارو ګدۍ پر غاړه لرلې، ایران کولی شوی له اروپا او یو شمېر نورو اقتصادي جزیرو سره خپلې سوداګریزې اړکې تودې وپالي خو د ټرمپ په راتګ سره ایران یو ځل بیا د اقتصادي انزوا په لومو کې را ګیر شو او په ملیاردونو ډالره زیان یې وکړ.

په دې وروستیو کې د ایراني او امریکایي لوړ پوړو چارواکو تر منځ په ټویټر کې هم یو بل ته ګوت څنډنې کېږي چې ډېری وخت دا ګواښونه د دواړو هېوادونو تر ولسمشرانو پورې هم ورسېږي. ټرمپ په وروستیو څو کلونو کې په ایران او چین باندې زیات تبلیغاتي ګوزارونه کوي.

ایران په دې وروستیو کې د امریکا له بندیزونو سره سره وینزیویلا او یو شمېر نورو هېوادونو ته خپلې سوداګریزې بېړۍ واستولې خو د کرونا وبا له امله یې اقتصاد نور هم نزولي روان دی. د ایران د ولسمشر مرستیال اسحاق جهانګیري په خپلو تازه څرګندونو کې ویلي دي چې بې سارې توګه یې د تېلو عایدات له ځوړ سره مخ دي.

نوموړي زیاته کړه چې دا په تېر کې د ایران لپاره د بندیزون له امله د تېلو د عایداتو بې مخینې نزولي عایدات دي چې ایران ورسره مخ شوی دی. جهانګیري وایي چې دې کثر د دولت ټولې برخې اغېزمنې کړې دي.

د ټرمپ تر واکمنۍ لاندې امریکا په دې وروستیو کې په ایران باندې د بندیزونو څپه یو ځل بیا زوروره کړې ده او له ګاونډیو هېوادونو سربېره یې له نړۍ سره د ایران د تېلو راکړه ورکړه باندې محدودیتونه وضع کړي دي.