سټیفانو؛ د طالبانو ډېری بندیان نه خوشي کېږي

خبریال وېب پاڼه/د ناټو ملکي استازي یو ځل بیا هم ټینګار کړی دی چې د طالبانو ډېری بندیان به د تاوتریخوالي د تداوم له امله خوشي نه شي.

د وسله والو طالبانو لخوا د تاوتریخوالي د دوام په غبرګون کې د ناټو ملکي استازي سټیفانو په خپلو وروستیو څرګندونو کې ویلي چې د طالبانو ډېری بندیان په خوشي نه شي او د بین الافغاني مذاکراتو پر مهال به پرې بحث کېږي.

وروسته له هغه چې وسله والو طالبانو له امریکا سره د سولې تړون لاسلیک کړ، دغې ترهګرې ډلې په افغان وژنې باندې لاس پورې کړ او خپل بریدونه یې د پخوا په پرته په مراتبو زیات کړل.

شنونکي وایي، طالبان هڅه کوي د امریکا له نه مداخلې نه ګته پورته کړي او په خپو ظلمونو او افراطیتونو په ولس او هېواد کې د وېرې خپرولو په لړ کې ډېر امتیازات تر لاسه کړي. دوی همداراز وایي چې دغه وسله واله او ترهګره ډله چې د پاکستان کلک ملاتړ له ځان سره لري، غواړي یو ځل بیا د ۹۰ مې لسیزې په شان په افغانستان کې د پاکستان لپاره جګړه مخته یوسي او د نظام په کمزورۍ کې خپل رول ادا کړي.

وسله وال مخافین چې د پاکستان د څارګرې ادارې کلک ملاتړ له ځان سره لري، په دې وروستیو کې د جنګي تکتیک په بدلولو سره په افغانستان کې دیني علماء، د نظر خاوندان او ټول هغه ملکي او نظامي وګړي چې د هېواد پالنې او اسلام سالارۍ کلکې عقیدې لري، په نښه کوي او په شهادت یې رسوي.

دغې ترهګرې ډلې په افغان امنیتي ځواکونو، د سړکونو په ورانولو او د پلونو په الوځولو باندې یې هم سلاس پورې کړی دی او تر اوسه یې لسګونه پلونه او سړکونه اړولي دي. څېړونکي اندېښنه لري چې که د سولې بین الافغاني مذاکرات هر څومره ځنډېږي، زیان به یې افغان خاورې او له عامه تاسیساتو ورانولو سربېره ټول ولس ته رسېږي.

په دې وروستیو کې د کرونا وبا په راتګ سره د بین الافغاني مذاکراتو بهیر هم ځنډېدلی دی.

د ناټو ملکي استازي له یوې رسنۍ سره په خپله وروستۍ مرکه کې ویلي دي، په داسې حال کې چې افغان حکومت د طالب بندیانو په خوشي کولو لګیا دی، یو شمېر طالبان به په لومړي سر کې خوشي نه کړي او دوی به د مذاکراتو پر مهال له بحثونو وروسته خوشي کېږي.

سټیفانو یو ځل بیا هم ویلي دي چې دوی به له افغان حکومت سره خپل بشپړ ملاتړ ته دوام ورکوي.