اردوغان:کشف شوي زیرمې زموږ اړتیاوې پوره کوي

خبریال ويبپاڼه/ په نننۍ غونډه کې د عدالت او پراختیا ګوند ولایتي کانګرس ته وینا کې، د ترکیې ولسمشر رجب طیب اردوغان په ساکاریا کې د ۴۰۵ ملیارډ متر مکعب د ګازو نوي سرچینو کشف ته په اشاره سره وویل: دا به د اوږدې مودې لپاره د هیواد اړتیاوې پوره کړي.

هغه زیاته کړه”ټول موجود معلومات ښیې چې د موندلو لپاره خورا بډایه سرچینې شتون لري”. د سیمې د ځینو هیوادونو برخلاف، موږ نه غواړو چې دا سرچینې استخراج او د امریکایانو او اروپایانو جیبونو کې یې واچوو. موږ به دا د هیواد د ۸۱ ولایتونو د پرمختګ او راتلونکي لپاره وکاروو.

د اردوغان په خبره، زموږ د نیکونو او نیاګانو ژوند د جګړې په جبهه کې تیر شوی و، او زموږ ژوند د دوی د حقونو او آزادیو د غزولو لپاره په مبارزه کې تیر شو. موږ هڅه کوو د خپلو لمسیانو لپاره لویه او ځواکمنه ترکیه په میراث کې پریږدو.

تیره ورځ اردوغان د ترکیې په توره بحیره کې  د ۸۵ میلیارده متر مکعب ګازو د نوې زیرمې د موندولو زیری ورکړ

د ترکیې ولسمشر رجب طیب اردوغان تیره ورځ د ولسمشرۍ ماڼۍ د مرستیال فواد اوکتای، خزانې او مالیې وزیر برات البیرق، د ولسمشرۍ ماڼۍ د عامه اړیکو رئیس فخرالدین التون او ولسمشرۍ ماڼۍ د ویاند ابرهیم قالن سره په ګډه په توره بحیره کې د ګازو د پلټون په چارو بوختې د فاتحې کښتۍ نه لیدنه وکړه.

ښاغلي اردغان ویلي، چې د ۲۰۲۰ کال د جولای په ۲۰ مه نیټه مو دلته د ګازو د پلټون چارې پیل کړې  خو نن د الله نه د شکر ځای دی چې هدف ته ورسیدو

هغه وویل چې دلته مو د جولای په ۲۰ مه نیټه  د ګازو په پلټون پيل وکړ چې لومړنی زیری مو د اګست په ۲۱ مه نیټه د هیوادالو سره شریک کړ.  په لومړي پړاو کې ۳۲۰ میلیارده متر مکعب ګازو وموندل شول. اوس په همدې کوهي کې د ګازو یوه بله طبقه موندل شوې چې ۸۵ میلیارده متر مکعب ګاز پکې شتون لري.

اردوغان وویل چې “موږ په ختیځ مدیترانه کې د هایدروکاربن سرچینو شریکولو څخه ترکیې د جلا کولو هڅې نه منلو سره نوی دور پیل کړی دی.” موږ به داسې اقداماتو ته اجازه ورنکړو چې زموږ د هیواد او د شمالي قبرس ترکي جمهوريت خلکو حقونه نقض کړي.