fbpx

هند په ستر توپير انګلستان مات کړ

د هند او انګلستان ترمنځ دريمه ټيسټ لوبه ترسره شوه، چې هند پکې په ستر توپير بريا ترلاسه کړه. هند په ٢٠٣ منډو انګلستان ته ماته ورکړه او د لوبې د غوره لوبغاړي جايزه بيا ويراټ کوهلي ترلاسه کړه.

د هند او انګلستان ترمنځ د پنځوو ټيسټ لوبو لوبلړۍ روانه ده، چې دريمه ټيسټ لوبه يې د اګست په ١٨ پيل او ٢٢ پاى ته ورسېده. د لوبې پچه انګلستان وګټله او هند ته يې د توپوهنې بلنه ورکړه.

هند په لومړۍ پاڼۍ کې د ټولو لوبغاړو په سوځېدو سره ٣٢٩ منډې وکړې او ٩٤.٥ اورونه يې ولوبول، چې په دې کې کپتان ويراټ کوهلي ٩٧، اجينکى ريهانى ٨١ او شيکر دهون ٣٥ منډې وکړې. بل کوم لوبغاړى دېرشو ته ونه رسېد.

د انګلستان له خوا بيا انډرسن ٣، بروډ ٣، ووکس ٣ او رشيد ١ ويکټه ترلاسه کړه.

خو کله چې انګلستان لومړۍ پاڼۍ ته راووت، نو د هندي بالرانو توپونو ته يې لوبغاړي ټينګ نه شول او د انګلستان ټول لوبغاړي په ١٦١ منډو وسوځېدل، چې يواځې ٣٨.٢ اورونه يې ولوبول. تر ټولو زياتې منډې جى سي بټلر ٣٩ وکړې او کوک ٢٩ منډې وکړې.

د هند له خوا هاردک پانډيا خطرناکه توپ اچوونه وکړه چې د انګلستان ٥ لوبغاړي يې وسوځول، دوه بمراه، دوه اشانت شرما او يوه ويکټه بيا محمد شامي هم واخيسته.

که څه هم هند له انګلستان څخه په منډو کې ډېر مخکې و، خو دوهمې پاڼۍ ته هند بيا راووت.

دا ځل نو کپتان ويراټ کوهلي ډېر ښه وځلېد او سليزه يې ووهله.

هند د ٧ لوبغاړو په سوځېدو سره ٣٥٢ منډې وکړې، چې ١١٠ اورونه يې لوبولي و او خپله لوبه يې ډيکلئير کړه، تر څو انګلستان ته هدف ورکړي.

په دوهمه پاڼۍ کې هند هدف ٥٢٠ ته ورساوه، انګلستان ته د بريا لپاره ٥٢١ منډې نورې کول پکار و.

کپتان ويرات کوهلي ١٠٣، پوجاره ٧٢، هاردک پانډيا ٥٢ او شيکر دهون ٤٤ منډې وکړې.

رشيد ٣، سټوکس ٢، انډرسن ١ او ووکس ١ ويکټ ترلاسه کړه.

د انګلستان په دوهمه پاڼۍ کې جى سي بټلر او بين سټوکس ښه لوبه وکړه، خو انګلستان ياد هدف پوره نه کړ.

په دوهمه پاڼۍ کې د انګلستان ټول لوبغاړي په ٣١٧ منډو وسوځېدل، چې ١٠٤.٥ اورونه يې لوبولي ول او داسې يې په ستر توپير سره لوبه بايېلوده.

جى سي بټلر ١٠٦، بين سټوکس ٦٢ او رشيد ٣٣ منډې وکړې.

د هند له خوا بيا جسپريت بمراه ډېره خطرناکه توپ اچوونه وکړه او د انګلستان پنځه لوبغاړي يې وسوځول، اشانت شرما ٢، آر اشوين ١، محمد شامي ١ او هارک پانډيا هم ١ ويکټ ترلاسه کړه.

په دريمه ټيسټ لوبه کې هند انګلستان ته په ستر توپير، يعنې په ٢٠٣ منډو ماته ورکړه او د لوبلړۍ دا دريمه لوبه يې په خپل نوم کړه.

د لوبې غوره لوبغاړى بيا د هند کپتان ويراټ کوهلي شو، چې په لومړۍ پاڼۍ کې يې ٩٧ او په دوهمه کې يې ١٠٣ منډې وکړې او د هند په بريا کې يې ستر رول ولوباوه.

ياده دې وي چې له دې مخکې دوه لوبو کې انګلستان بريا ترلاسه کړې وه، دريمه لوبه د هند په نوم شوه، دوه لوبې نورې هم پاتې دي، که هند دواړه وګټي نو سيريز کې به بريا خپله کړي او که انګلستان يوه لوبه وګټي نو سيريز به په خپل نوم کړي.

Your SEO optimized title page contents