زموږ په ټولنه کې (خياط) او (موچي) دوه هغه کسبونه دي، چې زموږ ژوند ورسره ډېر زيات تړل شوى دى، يعنې که چېرته خياط نه واى، نو د انسان تر ټولو زيات ضرورت لرونکي (کالي) به يې له کومه کول؟
همدا راز موچي موږ ته پېزار ګنډي\جوړوي، که چېرته مو په ټولنه کې موچي نه درلوداى، نو بيا پښې ابله ګرځېداى او نن سبا چې موږ دا خوندور خوندور پېزار په پښو کوو، دا به مو نه درلوداى.
که چېرته موږ دې دواړو کسبونو ته (خياط او موچي) ته په سم ډول نظر وکړو، نو دا دواړه ډېر ښه کسبونه دي، بايد چې دې دواړو کسبونو او د دواړو کسبونو هنرمندانو ته په ډېر درنه سترګه وکتل شي، ځکه که دوى نه واى، نو موږ به کالي او پېزار له کومه کول.
له څه وخت راهيسې د ولسمشر ډاکټر اشرف غني پلويانو ته يوه ډله خلک د (خياط) تورى کاروي، دوى تل په خپلو ليکنو کې د اشرف غني پلويانو ته پېغور ورکوي، چې دوى د غني خياطان دي، له خياطانو دوى دا مانا اخلي، چې ولسمشر غني هر ډول کار کوي، نو پلويان يې ورته ډول ډول کيسې جوړوي او هغه ستايي، مانا دا چې دوى ورته پرتوګ ګنډي.
خو هغه کسان چې په ولسمشر غني ميين دي او د هغه پلوي کوي، هغوى په دې وياړي او وخت نا وخت دا خبره هم کوي، چې دوى په (خياطۍ) وياړ کوي او دا خياطي د خپل هېواد لپاره کوي.
خو د دې تر څنګ اوس نوې تازه اصطلاح چې جوړه شوې ده، هغه د (موچيانو) اصطلاح ده، کومه چې اوس د پخواني ولسمشر حامد کرزي د پلويانو لپاره کارول کېږي.
د (موچيانو) اصطلاح ډېره نوې ده، ځکه تازه تازه په دې اړه د ټولنيزو رسنيو کاروونکو ليکنې پيل کړي دي او د حامد کرزي پلويانو ته دا اصطلاح کاروي. کوم خلک چې د (موچيانو) اصطلاح د حامد کرزي د پلويانو لپاره کاروي، مانا ترې دا اخلي چې دا خلک د حامد کرزي څپلۍ\بوټان\پېزار ګنډي، يعنې هرې خبرې ته يې سمه وايي.
په دې اړه نوموتي ليکوال او شاعر استاد عبدالغفور لېوال ليکلي دي، چې (خياطان) او (موچيان) د ټولنې دوه خدمتګار، خواريکښ او درانه صنفونه دي، دا د خپلو مخالفينو لپاره د سپکاوي په ډول کارول يوه ټولنيزه ناروغي ده او اخلاقي ښويېدنه ده.
نوموړى زياتوي، هر هغه کسب چې قانون نه ماتوي، او انسان ته زيان نه اړوي، شريف کار دى او زر ټوپکوال او تنظيمي ترهګر دې يې پښو ته حلال شي. نوموړى وايي چې ځانونو ته ټکان ورکړئ، سړې اوبه پر ځان واړوئ او وګورئ چې کومې خوا ته روان ياست.
اسد الله ښالېز په خپله فېسبوکپاڼه ليکي:
((خیاطان او موچیان دې کم نشي!
له یوه هوښیار مشره مې اورېدلي و چې کسبونو ته په سپکه کتل د انګرېز لمسون و، د (تفرقه واچوه حکومت وکړه) سیاست له مخې يې په کلیوالي ژوند کې دې حربې ښه ګټه ورته وکړه، که به یې غوښتل د چا زړه له چا بد او تر ده یې ټيټ وښایي نو و به یې ویل چې ته نو ځان له جولا/پښ/ترکاڼ/نایي (ډم)/ټټار/پیکوټ…. سړي سره مه برابروه! حیثیت ته دې زیان رسېږي، زما مشوره ومنه او په دغه ډول یې له پښو وغورځوه.
نن په یوه بحث کې د اشرف غني پلویانو د کرزي پلویان په موچیتوب توهین کړل او خدای شته د خپلو کسبګرو هېوادوالو راتلونکې ته سودا واخیستم.
ژوند ژوند کسبګرو!))
نورالله ښاد بيا پر خپله فېسبوکپاڼه ليکلي دي، چې خياطان او موچيان لکه کروندګر د کار خلک دي او شريف خلک دي، د دوى قدرداني پکار ده. دوى کار ډېر کوي او خبرې لږې کوي.
انورالحق يرغل ليکي:
((نه موچيان چندان خلک دي نه خياطان، زه موچيان او خياطان هغوى ګڼم چې د پيسو بدل کې د ولسمشر غني، حامد کرزي او…. ناروا هم روا ګڼي.))
سميع الله مهال بيا ليکي:
((زمونږ مدني فعالان د خياط او موچي په تعريف او سپکه باندی بوخت دي، چی دا کارونه د ځوانانو ملي فکر او وخت لپاره زهر دي.))
د ليکنې مقصد او مدعا مې دا ده، چې د خدمتګارو او درنو خلکو دا کسبونه مه سپکوئ، دا تاسو په زوره د يوه چا سپکاوى کوئ او هغه دې ته مجبورئ، چې له ياد کسب څخه لاس واخلي، که چېرته زموږ دا دوه کسبونه دومره سپک شول، نو بيا مجبوره يو چې کالي او پېزار مو له نورو هېوادونو راوارد کړو او په خپل هېواد کې مو دا هر څه ورک شي.
د يوه چا په پلوۍ او مخالفت کې ځانونه تر دې حده پورې مه راټيټوئ، چې هم خپل ملګري او دوستان خپه کړئ او هم د نورو خلکو زړونه ازار کړئ، که د يوه چا مخالفت کوئ هم يې د ادابو په دايره کې کوئ او که يې پلوي کوئ نو هم د نورو خلکو پام ساتئ. دولتي چوکۍ به نن وي، سبا به نه وي، خو که د يو چا په سر مو خپله ملګرتيا خرابه کړه، نو تل به مو خپل ملګري له لاسه ورکړي وي.
بيا هم وايم کسبونه مه سپکوئ، د کسبونو او کسبګرو درناوى وکړئ.