پکتیا کې د الیاس داعي په نوم یو واټ ونومول شو

خبریال وېب پاڼه/ د پکتیا مرکز ګردېز ښار کې د خبریال شهید محمد الیاس داعي په نوم یو واټ ونومول شو.

په هلمند ولایت کې د ازادي راډیو خبریال محمد الیاس داعي پرون په یوه چسپکي ماین چاودنه کې په شهادت ورسېد.

د داعي پر شهادت په هېواد دننه او بهر د خبریالانو، سیاستوالو او پښتنو مشرانو ګڼ غبرګونونه را پورته شول او د نوموړي د شهادت پر پېښه یې خواشیني وښوده.

پرون د داعي د شهادت پر غبرګون په کابل کې د خبریالانو او رسنیو بنسټونو فدراسبون احتجاج درلود، چې د شهید داعي د قاتلینو د نیولو غوښتنه یې وکړه او له حکومت یې په کلک وغوښتل چې د خبریالانو د ژوند خویتوب او امنیت ته پام وکړي.

نن په کابل او یو شمېر ولایتونو کې د خبریالانو او فعالانو له خوا د شهید داعي فاتحه واخیستل شوه او سبا هم په کابل او له هېوادنه بهر د پي ټي اېم، کاناډا او امریکا کې د افغانانو له لوري زوم فاتحه اخیستل کیږي.

د شهید محمد الیاس داعي د شهادت مسؤولیت تر دې دمه کومې وسله والې ډلې پر غاړه نه دی اخیستی، خو نوموړي ته په دې وروستیو کې د وژنې ګواښونه کېدل.

شهید الیاس داعي په جنوبي حوزه کې په هلمند ولایت کې یو پیاوړی خبریال وو، چې له ٢٠٠٦ز کال را هیسې د ژورنالېزم ډګر ته را وتی وو او په ٢٠٠٨ز کال کې له ازادي راډیو سره د خبریال په توګه دنده پیل کړه، چې له څه باندې لسو کالو را په دې خوا له یادې راډیو سره خبریال پاتې شو او بالاخره نن د معلومو وسله والو له لوري په ماین چاودنه شهید شو.