طالبان دې له حکمتيار څخه عبرت واخلي

خبریال وېبپاڼه/ ګلبدين حکمتيار چې يو وخت ددې هېواد په سرنوشت کې د غوږ نيونې کس و او خلکو یې خبره اورېده اوس يې د خلکو ترمنځ ځای ورک دی، حکمتیار د اوږده مخالفت وروسته اوس په کابل کې مېشت دی، وروسته له هغه چې ولسمشر غني د حزب اسلامي سره د سولې توافقنامه لاسليک کړه ګلبدين حکمتيار کابل ته راغی او خپل سياسي فعاليت یې دلته پيل کړ.

حکمتیار د افغانستان په سياست کې يوه پېژندل شوې څېره ده، هغه د شوروي اتحاد په وړاندې په جګړه کې د خپل شهرت اوج ته ورسېد او په افغانستان کې یې ځانته د خلکو یوه د پام وړ کتله‌ پیدا کړه، شوروی په افغانستان کې مات شو او د ډاکټر نجيب د حکومت سره د يو جوړجاړي وروسته ېې خپل پوځونه د افغانستان څخه بهر کړل.

حکمتيار د شوروي وروسته
تر هغه پورې چې د شوروي عسکر په افغانستان کې موجود و د خلکو د پام وړ برخې حکمتیار او نور هغه خلک چې د شوروي په وړاندې جنګېدل د درناوي وړ ګڼل، که څه هم د شوروي سره جګړه بېلابېل ابعاد لري خو يوه خبره چې انکار ترې ګران دی هغه داده چې د افغانستان خلک د شوروي د عسکرو مخالف و، افغانانو نه غوښتل په هېواد کې یې د شوروي عسکر و اوسي، که حکمتيار نه وی بل څوک حتماً پيدا کېده چې ددې خلکو مشري وکړي او د شوروي په وړاندې لاس وسلې ته اوږد کړي، خو دلته مسله د شوروي د يرغل وروسته پېچلې کېږي.

وروسته له هغه چې د شوروي اتحاد پوځيان د افغانستان څخه ووتل نو تمه دا وه چې د حکمتيار په شمول ټول مخالف ګوندونه او حرکتونه سره راټول شي او د موجود نظام يوه برخه شي او نظام وساتي، دا هغه څه و چې ونه شول، د حکمتیار په شمول ګڼو نورو ډلو هم دا کار ونکړ او د ډاکټر نجيب د حکومت سره يې تر هغه جنګ وکړ چې نور په هېواد کې ډېری بنسټونه له منځه ولاړل، د ډاکټر نجيب سره د جګړې ترڅنګ بيا د جهادي ډلو جګړې هم رامنځته شوې چې دا ځل یې افغانستان د یو نسبي اباد هېواد څخه په يوه ویرانه او يوه کنډواله بدل کړ.

اوس خلک او ګلبدين حکمتيار
اوس چې د خلکو څخه د حکمتیار په هکله پوښتنه وکړئ نو نوم یې اورېدل نه غواړي، د حکمتيار محدود پلویان بيا دا ټول مخالفین په بې دينۍ تورنوي، د افغانستان ۱۳ ميلیونه وګړي انټرنټ کاروي، ۳,۷ ميليونه یې فېسبوک کاروي، تاسې شاهدان ياست چې په ټولنيزو رسنيو کې د ګلبدین حکمتیار وینا او یا کوم کار ته د خلکو غبرګون څه وي، يو لنډ مثال یې د تېرې ورځې ورکولی شو، تېره ورځ د پښتون ژغورنې غورځنګ يوه مخکښ غړي ګلبدين حکمتيار ته وويل چې د اسلام اباد څخه دې د کابل په خلاف نه غږېږي، داوړ وويل ګلبدین دې د اسلام اباد نه کابل ته د جګړې خبرې نکوي.

د محسن داوړ ددې خبرو په غبرګون کې د ګلبدین حکمتیار زوی حبيب الرحمن حکمتيار په فېسبوک کې پوست وکړ، ده د خپل پلار سپیناوی کړی و خو د خلکو غبرګون داسې و چې نور یې د حکمتيار ځائ په ټولنه کې واضح کړ، د حکمتيار زوی ته د ۲۰ زرو ډېر کومنټونه شوي و چې پکې د حکمتيار په پلوی د شوي کومنټ پيدا کول سخت و.

دا اوس د حکمتیار ځای دی د خلکو ترمنځ، نوی نسل د حکمتیار څخه دومره نفرت لري چې نور د حکمتيار ډېر نېږدې کسان هم په دې قانع شوي دي چې حکمتيار نور که ښه دی او که بد خو د افغانستان په سياست کې ځای نلري، په حکمتيار نوره پانګونه صرف زيان دی.

طالبان دې حکمتيار ته وګوري
خلک د حکمتیار څخه په دې سبب نفرت نکوي چې ولې يې د شوروي پوځ سره جنګ کړی، بلکې خلک د حکمتیار څخه ځکه نفرت کوي چې ده د قدرت په جنون کې د شوروي پوځ د وتلو وروسته هم په افغانستان کې جنګ ته دوام ورکړ.

نن طالب هم د همداسې يو امتحان سره مخ دی، که د امريکايي ځواکونو د وتلو سره سره هم طالبان جګړې ته دوام ورکړي نو د افغان نسل او ملت دداسې نفرت سره به مخ شي چې بيا به يې څوک ښه او بد دواړه یو ګڼي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More