طالبان پيش قدم شول، د وخت سره په جنګ غني

خبريال وېبپاڼه/ په دوحه کې د طالبانو د سياسي دفتر وياند ډاکټر نعيم وردګ په رسمي ډول د حکومت د استازو او دوی ترمنځ د سولې د خبرو د طرزالعمل توافق تائيد کړ.

د طالبانو له لوري ددې طرزالعمل توافق په داسې حال کې رسنيز کېږي چې د حکومت مشر ولسمشر غني ددې توافق مخالفت کوي، د حکومت استازي بيا پخپله د ولسمشرۍ سره په ټکر کې دي، حکومتی استازو دا منلې چې د طالبانو سره يې توافق کړی دی او‌ ولسمشر غني بايد دا توافق ومني.

نړيوال فشار
د حکومت د استازو څخه حفيظ منصور پرون په کابل کې د يوه خصوصي تلويزيون سره په مرکه کې وويل چې ټوله نړۍ د طالبانو سره توافق غواړي، نو اوس دوی هم د طالبانو سره د خبرو په طرزالعمل باندې توافق کړی دی، حفيظ د ولسمشر غني مخالفت ته په اشارې سره وویل چې اوس ددې توافق مخالفت بې ځايه کار دی ځکه نړيوال همدا غواړی او همدا به عملي کېږي.

ولسمشر غني د وخت سره په جنګ کې ښکاري، په داسې حال کې چې ټوله نړۍ د طالبانو سره د سولې د خبرو د پرمختګ طرفداره ده نو ښکاري داسې چې ولسمشر غني دا پرمختګ چندان نه غواړي.

طالبانو په رسمي ډول دا اعلان وکړ چې دوی د حکومت د استازو سره د خبرو طرزالعمل منلی دی، که څه هم تمه وه حکومتی استازي اشرف غني راضي کړي او بيا په ګډه‌ددې توافق اعلا وشي خو طالبانو ولسمشر غني ته صبر ونکړ او د حکومت د استازو سره رامنځته شوی توافق یې اعلان کړ.

غني به څومره مقاومت وکړي
غني په دې پوهېږي چې بشپړه سوله دده څخه د واک قرباني غواړي کوم ته چې دی په هېڅ ډول تيار نه دی، طالبان وايي د اوسنی حکومت سره ګډ کار نکوي، نو ددې لپاره دريمه لار حتماً د ولسمشر غني څخه لويه قرباني غواړي کومې ته چې ولسمشر غني نه دی تيار.

ان ځینې سرچینې وايي که حکومت دریم لوري ته د قدرت د انتقال خبره ومني نو کېدی شي چې طالبان اوربند هم ومني.