د ملي لوبډلې لوبغاړي نور علي ځدراڼ د کرکټ بورډ پر ضد ويډيو خپره کړه

د افغانستان د ملي لوبډلې يو تکړه د پيل توپوهونکى نور علي ځدراڼ، چې اوس مهال د افغانستان کرکټ بورډ د توپيري چلند له امله له کرکټ بورډ څخه خپه دى او تازه يې د کرکټ بورډ په اړه يوه ويډيو په خپله رسمي فېسبوکپاڼه خپره کړې ده.

نوموړي په خپله ويډيو کې د افغانستان غوره ليګ په اړه ويلي دي، چې د افغانستان غوره ليګ ټول کارونه کرکټ بورډ د پردې تر شا کړي دي او ولس يې هېڅ نه دى خبر کړى، هغه وايي چې له کوم هندي شرکت سره کرکټ بورډ قرارداد کړى، هغه يو بې نومه شرکت دى، خو کرکټ بورډ ورسره يواځې په دې اړه خبره کړې، چې پېسې ورسره شريکې کړي.

د افغانستان غوره ليګ د پنځه لوبډلو په اړه نور علي ځدراڼ په خپلو خبرو کې وويل، چې کرکټ بورډ پنځه نه، بلکې تراوسه يواځې درې لوبډلې خرڅې کړي دي. هغه وايي، چې يوه نږدې کس ورته وويل، چې کرکټ بورډ تېره ورځ المصافي شرکت ته پېغام استولى و، چې په افغانستان غوره ليګ کې دې يوه لوبډله واخلي. نوموړى زياتوي، که چېرته پنځه واړې لوبډلې خرڅې شوي وي، نو بيا کرکټ بورډ ولې المصافي شرکت ته وايي، چې لوبډله دې واخلي؟

نوموړي همدا راز زياته کړه، چې کله يې په فېسبوک د ويډيو خپرولو په اړه پوسټ وکړ، نو له هغې وروسته ورته د کرکټ بورډ نه يو کس وويل، چې د کرکټ بورډ مشرانو ډېرو لوبغاړو ته ويلي دي، چې د نور علي ځدراڼ او شاپور ځدراڼ ملاتړ مه کوئ، تاسو به په افغانستان غوره ليګ کې ولوبوو. هغه زياتوي، چې په اې پي ايل کې د کرکټ بورډ لاس نشته، نو څنګه بيا لوبغاړو ته دا ډول خبرې کوي؟

بلخوا د بولۍ په اړه ځدراڼ وويل، چې په بولۍ کې درې لوبډلې ناستې وه، پاتې دوه لوبډلې د کرکټ بورډ خپل نمايشي کسان و او همدا راز له هغه نورو درې لوبډلو سره هم د کرکټ بورډ کسان ناست ول او د داخلي لوبغاړو په پېرلو کې ورته هغوى لوبغاړي په ګوته کول، يعنې تر ټولو زيات لاس په دې هر څه کې د کرکټ بورډ و. نوموړي زياته کړه، کوم لوبغاړي چې له خرڅلاو پاتې شول، د بولۍ په اخره کې يواځې د هغه لوبغاړو يادونه وشوه، کوم چې د دوى خپلوان و، کوم چې يې خپلوان نه و، د هغوى يادونه هيچا ونکړه.

نور علي همدا راز د لوبغاړو د منېجر نور آغا همکار په اړه وويل، چې نور آغا همکار تل خلکو ته دا ويلي دي، چې نور علي ځدراڼ ټپي دى او کرکټ نه شي کولاى، يا هم نه غواړي چې نور کرکټ وکړي. هغه زياتوي، چې همکار يې تل حق خوړلى دى او هر ځاى کې يې د ده پر ضد تبليغات کړي دي.

نوموړي وويل، چې له دې ويډيو وروسته به يوه  بله ويډيو خپره کړي، چې په هغې کې به د سليکشن کمېټې د يوه غړي په اړه ډېر معلومات له خپلو مينه والو سره خپاره کړي.

دا دوهم ځل دى، چې د کرکټ بورډ پر ضد باندې لوبغاړي راپاڅېږي او د کرکټ بورډ له ګنده سياست څخه پرده پورته کوي. له دې مخکې هم، کله چې نسيم دانش د کرکټ بورډ رييس و، شاپور ځدراڼ، شفيق الله شفق او يو شمېر نور لوبغاړي رسنيو ته راووتل او د نوموړي په اړه يې خبرې وکړې، چې له لوبغاړو سره توپيري چلند کوي او کرکټ بورډ ادارې څخه يې خپل شخصي شرکت جوړ کړى دى. اوس د عاطف مشعل پر ضد يو ځل بيا لوبغاړي راپاڅېدلي دي، که څه هم له ډېر پخوا راهيسې د عاطف مشعل په اړه دا اوازې خپرېدې، چې په کرکټ بورډ کې يې پراخ فساد روان کړى دى، خو اوس ورپسې د افغانستان ملي لوبډلې لوبغاړي هم راپورته شوي دي او په توپيري چلند يې تورنوي.