ننګرهار: بې وزلو لپاره د کرونا فنډ مرستندویه صندوق پرانیستل شو

خبریال وېب پاڼه/ ننګرهار کې د بې وزلو او اړمنو کورنیو سره د مرستو لپاره د کرونا فنډ په نوم مرستندویه صندوق پرانیستل شو.

د ننګرهار والي شاه محمود میاخېل په نوښت بې وزلو او اړمنو کورنیو سره د مرستې لپاره یاد صندوق پرانیستل شو.

له کرونا فنډ مرستندویه صندوق سره لومړنۍ مرسته د ننګرهار والي شاه محمود میاخېل وکړه، چې په دې توګه یې د خپلې یوې میاشت معاش او کورنیو له لوري راټول شوي ٥٣٠٠ ډالر مرسته وکړه.

د دې صندوق د مرستو ټولولو او چمتو کولو مسؤولین وایي، له دې صندوق سره د نورو مرستو راټولولو لپاره به بانکي حسابونه هم پرانیستل شي.

په ننګرهار کې د بې وزلو او اړمنو کورنیو سره د مرستو لپاره کرونا فنډ مرستندویه صندوق داسې مهال پرانیستل کیږي، چې له څو ورځو راهیسې دا ولایت قرنطین شوی، د ګڼې ګوڼي او تګ را تګ پر ځایونو بندیز لګېدلی او ورسره جوخت د هټۍ والو له لوري بیې پورته شوې دي.

که څه هم د ننګرهار ولایتي ادارې د هټۍ والو د احتکار پر وړاندې اقدام وکړ او د بیو لوړولو له کبله یې یو شمېر هټۍ وتړلې، خو بیا هم ځایي خلک شکایت کوي چې لا هم د خوراکي او لومړنیو د اړتیا وړ توکو بیې اسمان ته ختلي.

له کرونا ویروس څخه د خوندیتوب او مخنیوي لپاره د هېواد یو شمېر لوی ولایتونه قرنطین شوي.

د پلازمېنې کابل د ګرځبندیز طرحه چې پرون(جمعه وري ٨مه) د کابینې له لوري تصویب شوه، خو نن هم کابل ښاریان په ښار کې ازاد تګ راتګ کوي.

په ورته مهال په یو شمېر سیمو کې د مدني فعالانو له لوري هم، د کرونا ویروس په خلاف کور پر کور عامه پوهاوی پیل شوی او دوی ټینګار کوي، چې په دې اړه باید خلکو ته عامه پوهاوی ورکړل شي، تر څو د کرونا ویروس ګواښ ته متوجه شي او ځانونه وساتي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More