یو ځل بیا په ټینګار سره له عمران خان د استعفا غوښتنه وشوه

خبریال وېبپاڼه/ د پاکستان په ملتان ښار کې د مخالفو سياسي ګوندونو مشرانو د یوې سترې ولسي غونډې په ترڅ کې یو ځل بیا له عمران خان د استعفا غوښتنه وکړه.

که څه هم پاکستانی حکومت پر دغې غونډه بندیزونه لګولي وو او لسګونه فعالان یې نیولي وو، خو له دې سره سره د زرګونه کسانو پکې ګډون کړی وو.

په غونډه کې چې د مخالفو سیاسي ګوندونو مشرانو د خپلو ویناوو پر مهال د اوسني حکومت پر ضد خپل دریځ تکرار کړ او له عمران خان غوښتنه وکړه چې د پاکستان د سیاسي او اقتصادي ثبات لپاره نور له واک لاس په سر شي.
مخالفو ګوندونو ادعا وکړه، چې د تحريک انصاف اوسنی واکمن ګوند په ټاکنو کې د درغليو په اساس مخته شوی او واک ته د همدې ګوند له رسېدو سره په پاکستان کې اقتصادي او سياسي بې ثباتي پراخه شوې ده.

پر اساسي قانون بشپړ عمل، په سیاست کې د پوځ او استخباراتو نه لاسوهنه، خپلواک پارلمان، خپلواکه محکمه، پاکې او رڼې ټاکنې، د بیان ازادي او د ترهګرۍ ختمېدل دغه غورځنګ د خپلو مهمو غوښتنو په توګه یادې کړې.

د غورځنګ مشران وايي، تر هغو چې دغه غوښتنې يې منل شوې نه وي، د دوی احتجاجونه او ولسي غونډې به نه یوازې دوام ولري، بلکې تر دې به هم سخت ګامونه واخلي.

د مخالفو سیاسي ګوندونو غورځنګ څه موده مخکې هم په پېښور کې هم د پاکستاني حکومت پر ضد ستره ولسي غونډه جوړه کړې وه او د پاکستاني حکومت پر ضد یې خپل دریځ څرګند کړ.

د پاکستان ديموکراسۍ غورځنګ د دغه هیواد د ۱۱ سیاسي ګوندونو ګډ غورځنګ دی، چې د لومړي وزیر عمران خان د حکومت پر ضد جوړ شوی او تر دې وړاندې يې په کوټه، کراچۍ او ګوجرانواله کې هم لويې ولسي غونډې کړې دي.‌