د (۲۰۱۸)م کال (سپټمبر) مياشتې پر (۱۵)مه نېټه ماښام (۷) بجې کرکټ بورډ ته د يوې ځانګړې او غير رسنيزې ناستې لپاره ځينې خبريالان بلل شوي و، زه شاوخو اووم کس وم چې کرکټ بورډ ته ورسېدم، هلته يې بېرون په چمن کې څوکۍ او مېزونه ايښي و، تر څو ټول خبريالان دلته راجمع شي او بيا کنفرانس خونې ته لاړ شي، خبريالان راغلل، کنفرانس خونې ته لاړو، ټول شاوخوا (۲۳) نفر و، چې ځينې يې په لاندې ډول دي.
واصل وصال (ازادۍ راډيو)، سميع الله پام (شمشاد ټلوېزيون)، شمس الرحمن شمس (لغمان څخه)، فريد سعادت (کابل نيوز)، صابر (طلوع ټلوېزيون)، ظاهر نوري (يک ټلوېزيون)، فياض حميد (ژوندون ټلوېزيون)، ساير ځلاند، خوشال تایب (بي بي سي)، سيد رضا (تمدن ټلوېزيون، عزيز اتل (ملي ټلوېزيون)، ايمل شېرزاد (لمر ټلوېزيون)، اکبر توتاخېل (لمر ټلوېزيون)، محمد ولي مينه ناک، ذبيح الله او همدا شان د ځينو نورو ټلوېزيونونو او راديو ګانو خبريالان راغلي و.
د ناستې پيل د کرکټ بورډ وياند (فريد هوتک) په مقدماتي خبرو وکړ، وروسته بيا د کرکټ بورډ عمومي رييس (عاطف مشعل)، اجراييه رييس (شفيق ستانکزی) او ځينې نور غړي راغلل. د خبرو پيل عاطف مشعل وکړ:
عاطف مشعل پيل له وروستيو جنجالونو څخه و، چې د کرکټ بورډ او ځينو لوبغاړو تر منځ راپورته شوی دی، هغه وويل، هر کله چې په کرکټ بورډ کې د چا ګټې په خطر کې پرېوځي، نو بيا کرکټ بورډ باندې د فساد تور لګوي، که شخصي ګټې يې خوندي وي، بیا کرکټ بورډ کې هېڅ فساد شتون نه لري، زه له ټولو څخه هيله کوم، عذر ورته کوم، چې که په کرکټ بورډ کې د فساد په اړه اسناد لرئ راشئ او په څارنوالۍ کې عريضه وکړئ، اسناد رامخې ته کړئ، خو داسې بايد ونه کړو چې د شخصي ګټو د خونديتوب لپاره د (افغان پريمير ليګ) په څېر ګټوره او با ارزښته پروسه خرابه کړو.
هغه د نور علي په اړه وويل، کله چې يو شخص په (APL) کې نوم ثبتونه کوي، نو دا پروسه جوړه وي، کله چې د ځان لپاره ايجنټ يا استازی ټاکي، دا پروسه روغه وي، خو کله چې د کومې لوبډلې له لوري وانخيستل شي نو بيا پروسه کې فساد موجود وي، که داسې وای ته خو به له مخکې خبر وې، ولې دې مخکې دا فساد نه افشا کوه؟ هغه په دې موضوع ډېرې زياتې او تفصيلي خبرې وکړې. بيا يې پاکستان ته هم اشاره وکړه چې نه يې غوښتل افغان پريمير ليګ ترسره شي او د دې مخنيوی يې کوه، خو موږ په ډېرو هلو ځلو وتوانېدو په عربي اماراتو کې افغان پريمير ليګ ترسره کړو.
همدا شان د افغان پريمير ليګ د جوړښت او د لوبغاړو د اخيستنې پروسې په اړه د کرکټ بورډ اجرايوي رييس هم تفصيلي خبرې وکړې. بیا ښاغلي مشعل وويل، چې اوس ستاسو وار دی، که هر ډول پوښتنه، وړانديز يا نيوکه لرئ، مطرح کولای يې شئ.
لومړۍ پوښتنه د بي بي سي خبريال خوشال تايب وکړه، هغه وويل: اسيا جام ته مو تر اوسه څه کارونه کړي او د ميډيا برخه کې مو کوم کارونه کړي؟ همدا شان د نبي، راشد او شهزاد ويډيو باندې خلک نيوکه کوي چې ستاسو په فرمايش شوې ده.
مشعل ځواب ورکړ: موږ پوره چمتو يو، لوبغاړي مو د عربي اماراتو اب هوا سره بلد شول، د تمريناتو لپاره مو هم ډېر کار کړی، که څه هم اسيا جام ډېر مهم دی، خو لوی مسوليت زموږ لپاره (افغان غوره ليګ) دی، چې مديريت يې زموږ پر غاړه دی.
نوموړي د نبي د ويډيو په اړه داسې سپيناوی وکړ: زه هېڅکله کوم لوبغاړي ته نه وايم چې زما يا د ادارې ملاتړ وکړي، يوه ورځ په کندوز کې د زون کرکټ په اړه کومه خبره راغله، ميرويس اشرف زما د خبرې د تائيد لپاره زما ملاتړ وکړ، خو ما منع کړ چې ته لوبغاړی يې بايد په دې کارونو کې مداخلت ونه کړې، نو بيا نبي ته به ولې وايم چې زما په ملاتړ ويډيو وکړي، نيوکه پر هغوی شوې وه او خپل سپيناوی يې خپله کړی دی.
بيا د شمشاد ټلوېزيون خبريال سميع الله وويل، زه يوه غوښتنه او يوه پوښتنه لرم، هغه دا چې يو دې په افغان پريمير ليګ کې افغاني فرهنګ نړيوالو ته وړاندې شي، بل دې پښتو تبصرو او کومېنټرۍ ته وخت ورکړل شي، پوښتنه يې دا وه چې ولې په کابل کې د لوبغالي جوړېدو چارې نه پيلېږي؟
مشعل ځواب ورکړ: موږ په دې اړه کار کړی، هره لوبډله به د خپل زون د فرهنګ ښکارندويي کوي او په لوګو کې مو هم د همغه زون د ارزښتونو ښکارندويي کړې، همدا شان حميد حسن او يو بل کومېنټيټر باندې کار کوو چې په افغان پريمير ليګ کې کومېنټري وکړي، تر څنګ يې يوه سټوډيو باندې کار کوو چې هلته به پښتو او نورو افغاني ژبو باندې تبصرې کېږي.
کله چې د لوبغالي جوړېدو موضوع ته راغی، نو زياته يې کړه، زموږ په ملاتړ کوونکي (الکوزي کمپنۍ) باندې څه بلا پرېوتې، پيسې نه راکوي، موږ خپلې پيسې نه لرو او الکوزی شرکت يې نه راکوي. دې وخت کې شفيق ستانکزي وويل، الکوزی شرکت زموږ (درې اعشاريه پنځه) ميليونه ډالره قرضدار دی، او په دې روان کال کې خو يې يوه پيسه هم نه ده راکړې، که هر څومره ورته وايو پيسې راته نه راکوي. بيا مشعل وويل: الکوزي ته مو وويل، ډيزاين موږ جوړ کړی، هر څه موږ جوړ کړي، لوبغالی تاسو په همدې نقشه خپله جوړ کړئ، خو نظارت به يې موږ کوو، خو الکوزی شرکت يې نه مني. دوی په همدې تړاو نورې خبرې هم وکړې.
بيا شمس الرحمن شمس ته وار راورسېد، هغه لومړی د افغان کرکټ په پرمختګونو رڼا واچوله، خو خبرې يې څه اوږدې شوې، مشعل په منځ کې خبره ورقطع کړه، هغه په اخره کې ژر خپلې غوښتنې واورولې، شمس وويل، افغان کومېنټيټران دې پيدا کړای شي او د ژورنالېستانو لپاره دې يوه رسمي لوبډله جوړه شي.
مشعل لنډ لنډ ځوابونه وويل، افغان کومېنټيټرانو سره موفق يم، پخوانيو لوبغاړو باندې کار کوو، او ميډيا ټورنمنټ به هم په لاره اچوو، زه يې هم لېوال يم.
ورپسې ما (فياض حميد) او څو نورو خبريالانو لاسونه پورته کړل، مشعل زما طرف ته ګوته ونيوله او ويې ويل د هغه وار دی چې مخکې يې هم پوښتنه کول غوښتل، وار يې ما ته راکړ.
ما وويل: د اصولو له مخې کله چې لوبډله په سفر کې وي، لوبغاړو ته د هېڅ ډول مرکې، په رسنيو کې د نظر څرګندولو او په د ټولنيزو رسنيو کارولو اجازه نه وي، خو نن اسيا جام پيل شو او تېره شپه نبي، راشد او شهزاد پر فيسبوک د کرکټ بورډ په ملاتړ او د منتقدو لوبغاړو پر خلاف نظرونه څرګندول، تاسو ولې دوی ته په رسمي سفر کې د داسې کار اجازه ورکړې؟ دا د اصولو خلاف نه دي؟ په دغه ويډيو کې محمد نبي وايي، حکومتي چارواکي دې خپلې څوکۍ او چارې سمبال کړي، کرکټ دې موږ ته پرېږدي، دا خبره بې څه نه ده او تر شا يې ډېرې پوښتنې راولاړېږي، او بله دا چې که پر کرکټ بورډ يا نورو اشخاصو نيوکه وشي، نو ځواب يې هم بايد يا د کرکټ بورډ چارواکي يا وياند (فريد هوتک) ووايي، نه دا چې لوبغاړي په داسې موضوعګانو کې يو بل ته په ټولنيزو رسنيو کې ځوابونه ووايي، دا لومړی وار نه دی، تر دې مخکې اضغر افغان هم ورته چاره ترسره کړې وه. ښه به نه وي چې دې موضوع ته نور د پای ټکی کېښودل شي؟
شفيق ستانکزي او عاطف مشعل دواړو غوښتل زما د پوښتنې ځواب راکړي خو لومړی وار مشعل واخيست، نوموړي وويل، چې نيوکه يې پر لوبغاړو کړې وه، نو ځواب هم بايد لوبغاړي ورکړی وای، بيا د نور علي او شاپور پر پخوانيو کړنو په تشريحي ډول وغږېد، بيا وروسته بيا زما پوښتنې ته راغی او ويې ويل موافق يم، ځواب بايد لوبغاړي ونه وايي، بله دا چې تاسو د حکومتي چارواکو خبره وکړه، خو دا درته په ثبوت وايم، چې دا ټول کارونه د ځينو حکومتي چارواکو دي، زه دا ټول ثبوتونه لرم، (دلته مشعل لږ په احساساتي ډول وغږېد)، دا هم درته ووايم چې دا خلک زما هېڅ نه شي کولای، هسې ځان په عذابوي، داسې يې ډېر د کرکټ بورډ کارکوونکي غولولي و، خو زما يې هېڅ ونه کړل. مشعل بيا د نور علي موضوع ته راغلی، بيا يې تفصيلي خبرې وکړې، ان د نورعلي قرارداد ليک يې راوړ چې لاسليک کړی يې او شېراغا همکار يې خپل استازی ټاکلی و، مشعل وويل، ستا خو استازی همکار و او تا خپله ټاکلی و، نو بيا کرکټ بورډ په دې کې څه کار لري؟ نوموړي يو ځل بيا د نورعلي او شاپور په اړه خورا اوږدې او مفصلې خبرې وکړې. بيا شفيق ستانکزي وار واخيست، هغه هم شاوخوا شل دقيقې د شاپور او نورعلي په اړه وغږېد او هغوی يې په څلور مذهبه ملامت وبلل. دا يې هم وويل چې لوبغاړي دې دا فکر نه کوي چې موږ به په کرکټ بورډ کې تغيرات راولو، نسيم دانش هېڅکله د شاپور په څرګندونو له بورډ څخه نه دی لرې شوی، بلکې هغه يوه مياشت مخکې له رياسته لرې شوی و، دا خبره بيا وروسته عاطف مشعل هم تائيد کړه. شفيق ستانکزي زياته کړه، اصغر ستانکزي ويل چې مجيب ته مې وويل، ولې دې نورعلي وانخيست؟ هغه خو به دې اخيستی وای، مجيب وويل، ټيم کې يې ځای نه کېده.
دوی دواړه زما د پوښتنې په ځواب کې نږدې څلوېښت دقيقې وغږېدل، ما منځ منځ کې له دوی څخه خپل ځواب غوښته، خو دوی به ويل راځو ستا ځواب ته، خو تر اخره پورې ما د خپلې پوښتنې ځواب وانه ورېده، شايد ورسره وو هم نه.
بيا د ملي ټلوېزيون خبريال عزيز اتل وپوښتل: تاسو وويل کله چې د چا شخصي ګټې په خطر کې شي، نو کرکټ بورډ پر فساد تورنوي، نو ځينې داسې کسان وو چې ستاسو خلاف يې کنفرانسونه ورکړل، مرکې يې وکړې، تاسو يې پر فساد تورن کړئ، خو وروسته بېرته همغه کسان تاسو راوستل او پر دندو مو وګمارل، نو يا ورسره تاسو معامله کړې او يا بله کومه خبره ده.
مشعل: ځينې کسان ما لرې کړي و او ځينې خپله لاړل، عزيز الله فضلي به کار نه کاوه، لويې لويې خبرې به يې کولې، تخريب به يې کاوه، پر کرکټ بورډ بوج و، ما لرې کړ، کله چې مې لرې کړ، نو اکرم خپلواک راته زنګ ووهه، ما ورته وويل چې هېڅکله يې نه نيسم، بله ورځ فضلي عذر ته راغی او ما ورته وويل، کوم تورونه چې دې پر ما لګولي، هغه بېرته واخله او ويډيو وکړه، زه به دې ونيسم، همغه شان يې وکړل بيا بېرته په دنده وګمارل شو، فضلي مې پخوا هم نه خوښېده او اوس مې هم نه خوښېږي. دولس نفره نور چې بايکاټ يې کړی و، نورو خلکو غولولي و او برنامه يې ورکړې وه، ټولو بېرته بښنې وغوښتې، چې موږ غولول شوي و، بېرته راغلل. نوموړي د ځينو نورو کسانو نومونه هم واخيستل چې بيا يې جرګې او عذرونه رالېږه او ويل يې چې موږ بد کړي دي.
مشعل وويل: دلته يو نفر و، د ضيا ودان په نوم، نسيم دانش په دنده ګمارلی و، يوازينی کار يې دا و، چې خلکو ته ښکنځل وکړي، بل هېڅ کار يې نه درلود، زه چې کله راغلم، ما له دندې لېرې کړ، نو ضيا ودان ما ته راغی، عذر زارۍ يې راته وکړې، حتی تر دې چې راته وژاړي، خو ما ورته وويل چې له تا څخه خلک شکايت لري او ته خلکو ته ښکنځل کوې، خو چې کله مې له دندې لرې کړ، بيا يې ما باندې د فساد تورونه پورې کول.
د ناستې وروستۍ پوښتنه د ازادۍ راډيو خبريال واصل وصال وکړه، نوموړي وويل، د کرکټ بورډ په ګڼ شمېر غونډو کې سياسي چارواکو ته ډېر وخت ورکول کېږي، خو خبريالان حاشيې ته ويشتل شوي وي، همدا شان ولې په (افغان غوره ليګ) کې افغان پانګوال ګډون نه کوي او ولې پاکستاني لوبغاړو ته د لوبېدو موقع ورکړل شوې ده؟
عاطف مشعل د وصال په ځواب کې بيا په تشريحي ډول د (APL) په اړه مالومات ورکړل، د پانګوالو په اړه يې وويل چې ډېرو پانګوالو سره مو خبرې وکړې، خو چا زړه ښه نه کړ. د پاکستاني لوبغاړو لوبېدو په اړه يې هم خورا ډېرې اوږدې او مفصلې خبرې وکړې او دا چاره يې د افغان کرکټ په ګټه وبلله.
نوموړي زياته کړه، که لوبډلې وپلورل شي يا نه تاوان يې د (سنيکر) کمپنۍ دی، افغان کرکټ بورډ ته هېڅ زيان نه رسېږي.
د ناستې په وروستيو شېبو کې عاطف مشعل وويل، زه تاسو ته يو راز څرګندوم چې زه معاش نه لرم، زما معاش له کرکټ بورډ څخه نه دی، زه افتخاري کار کوم دلته، زه په ماموريت (مېشن) باندې يم، زه دلته د سمون لپاره راغلی يم، خپل کارونه چې بشپړ کړم، بیا چې هر چا ته پاتې وي، نو پر مخ به يې وړلای شي.
دې سره دغه ناسته پای ته ورسېده او ټول د ډوډۍ پر لور لاړو…