امنیتي ځواکونو کندهار کې ۱۸ طالبانو ته مرګ ژوبله اړولې

خبریال وېبپاڼه/ د کندهار چارواکي وايي، په تېرو ۲۴ ساعتونو کې ملي، امنیتي او دفاعي ځواکونو د ځمکنیو او هوايي عملیاتو پر مهال په دې ولایت کې ۱۸ وسله والو طالبانو ته مرګ ژوبله اوښتې ده.

د کندهار نظامي شورا د یوې خبرپاڼې په خپرولو ویلي، دغه عملیات د دې ولایت پنجوايي، ارغنداب او میوند ولسوالیو کې ترسره شوي دي، چې په نتیجه کې یې ۱۳ وسله وال طالبان وژل شوي او ۵ نور مرګوني دي.

خبرپاڼه زیاتوي، په یادو تصفیوي عملیاتو کې د وسله والو طالبانو یو عراده فیلډر موټر، درې بابه پټنځایونه او یو شمېر نورو مهمات هم له منځه وړل شوي دي.

د خبرپاڼې په حواله، په یادو عملیاتو کې ملي، امنیتي او دفاعي ځواکونو ته هیڅ ډول تلفات نه دي اوښتي او د ترهګرو د ځپلو په موخه ګډ تصفیوي عملیات په شدت دوام لري.

د چارواکو په خبره، دغه عملیات د ارغنداب ولسوالۍ تر تصفیې وروسته د (بابا صاحب) ګډو نظامي عملیاتو د دوهم پړاو یوه برخه وه، چې د وسله والو مخالفینو د ځپلو په موخه پیل شوي دي.

خو وسله وال طالبان بیا له خپله اړخه په جګړه کې د پرمختګ خبره کوي او وایي چې د موټر بم بریدونو او مخامخ جګړې پر مهال یې امنیتي ځواکونو ته درنه مرګ ژوبله اړولې ده.

په کندهار کې د وروستیو جګړو له امله له بېلابېلو ولسوالیو زرګونه کورنۍ ښار ته ګډه شوې دي، چي د سرپناه ځایونو د نشتون ترڅنګ له سختو اقتصادي ستونزو سره لاس او ګریوان دي.

په دوحه کې د طالبانو او افغاني لوري ترمنځ د سولې مذاکراتو پر کړنلارې د هوکړې سربېره د کندهار په شمول د هېواد په ګڼو ولایتونو کې د جګړې ډګر تود دی او عام افغانان د جګړې له ښکېلو اړخونو غواړي چې ژر تر ژره اوربند وکړي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More