د هوايي ډګر په شمول د کابل ښار پر یو شمېر سیمو راکټي بریدونه شوي

خبریال وېبپاڼه/  نن سهار شاوخوا اووه نیمې بجې د کابل ښار د خیرخانې سیمې له لوري د حامد کرزي نړۍوال هوايي ډګر په شمول د کابل ښار پر سیمو څلور راکټي بریدونه شوي دي.

کورنیو چارو وزارت پېښه تاییدوي او وايي چې دغه راکټونه له سراچه ډوله موټر د هوايي ډګر او خواجه رواش پر سیمو پر لور توغول شوي دي.

د یاد وزارت ویاند طارق ارین وايي، د هوايي ډګر لور ته توغول شوي راکټونه تلفات نه لري، خو د خواجه رواش پر سیمه کې یې یو تن شهید او یو تن ټپي کړی دی.

خو خبریال وېبپاڼې ته د  رسېدلو معلوماتو له مخې، یو توغندی د حامد کرزي هوايي ډګر دننه لګېدلی دی او د کام ایر هوايي شرکت یوه الوتکه هم زیانمنه کړې ده.

ټولنیزو رسنیو کې یوه ویډیو او عکسونه خپره شوې، چې پکې ښکاري، ویشتل شوي توغندي د خلکو په کورونو کې لګېدلي دي.

که څه هم ارګ ویلي، چې د امنیتي تړون یا میثاق امنیتي برنامې د تطبیق چارو له پیل سره سم د کابل ښار عمومي امن او نظم کې بېساری پرمختګ رامنځته شوی او لسګونه ترهګر او جنایتکاران یې نیولي، خو د کابل ښار له منځه پر هوايي ډګر او نورو سیمو توغندي بریدونه د کشفي او استخباراتي ادارو پر ضعف دلالت کوي.

شاوخوا درې اوونۍ مخکې د ارګ او سیمه ییزو ارګانونو خپلواکې ادارې په شمول د کابل ښار پر سیمو ۱۴ راکټي بریدونه وشول چې یو شمېرکسانو ته  پکې مرګ ژوبله واوښته.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More