تازه؛ په دوحه کې د سولې مذاکراتي ټیمونه رخصت شول

خبریال وېبپاڼه/ د قطر په پلازمینه دوحه کې د افغان سولې مذاکراتي پلاوي د شلو ورځو لپاره په رخصت تللي دي.

دغه خبره هم د افغان دولت د مرکچي ټیم یوه غړي او هم د ملي مصالحې د عالي شورا یوه غړي د نوم د نه ښودلو په شرط تایید کړې ده.

خو لا تر اوسه رسماً نه افغان دولت او نه هم طالبانو په خبرو کې د شل ورځنۍ دمې راتلو په اړه څه نه دي ویلی.

د افغانستان د دولت او طالبانو د خبرو له پيل نن پوره درې میاشتې ووتلې.

دوی د سپټمبر په دولسمه د قطر په پلازمېنه دوحه کې خبرې پيل کړې او په دریو میاشتو کې یې له ډېر تاویل ما ویل وروسته ایله د خبرو په اجنډا سلا وکړه.

په دوحه کې د افغان سولې مذاکراتي ټیمونه په داسې حال کې په شل ورځنۍ دمه اخلي چې په هېواد کې تر بل هر وخت د جګړې ډګر تود شوی او هره ورځ لسګونه کسانو ته مرګ ژوبله اوړي.

عام افغانان دې وضعیت سخت اندېښمن کړي او له ښکېلو اړخونو د ژر تر ژره د دایمي اوربند غوښتنه کوي.

نړۍوالو هم وار ـ وار پر ښکېلو اړخونو غږ کړی چې نور دې دایمي سولې ته د رسېدو لپاره اوربند وکړي.

د مذاکراتو ځنډ تر ښکاره علتونو هاخوا بېلابېلې پوښتنې پیدا کوي او په دې پروسه د شک ګومان کېږي.

دا چې د پردې تر شا به څه کیسه روانه وي او د چا د غوښتنو پر اساس دغه پروسه ځنډول کېږي، وخت به ځواب ووايي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More