د لوګر ۱۰۰ ښوونځي په اړینو لابراتواري توکو سمبالېږي

خبریال وېبپاڼه/ د لوګر د پوهنې ریاست وايي، د دې ولایت د مرکز پل علم او ولسوالیو د نجونو او هلکانو پر  ۱۰۰ ښوونځيو د ۲۷۰۰ قلمه اړینو لابراتواري توکو د وېش بهیر پیل شو.

د یاد ریاست لخوا په خپره شوې خبرپاڼه کې راغلي، یاد توکي د پوهنې ریاست د ساینس او ښوونیزې ټکنالوژۍ مرکز لخوا برابر شوي، چې شاوخوا یو میلیون افغانۍ ارزښت لري.

خبرپاڼه زیاتوي، دغه توکي به د نجونو او هلکانو پر ۱۰۰ ښوونځیو ووېشل شي، چې هر ښوونځي ته به ۲۷ قلمه بیلابیل لابراتواري مواد ورکړل شي.

سرچینه لیکي، د نوموړو توکو په وېشلو سره به یاد ښوونځي لا په لابراتواري توکو مجهز شي او هم به د عملي زده کړو په برخه کې د زده کوونکو ډېرې ستونزې هوارې شي.

د سرچینې په وینا، په یادو توکو کې د زده کوونکو د عملي زده کړو لپاره د ساینسي او ریاضي مضمونونو لابراتواري توکي، د لمریزې برېښنا سولر او بېټرۍ شامل دي.

د معلوماتو له مخې، په لوګر کې دا مهال د نجونو او هلکانو ۲۷۳ ښوونځي شته، چې ۱۴۰ ښوونځي لابراتوارونه او ۱۳۳ نور ښوونځي لابراتوارونه  نه لري.

لوګر پلازمینې کابل ته په ۶۰ کیلومټرۍ کې پروت دی، چې د ځینو ولسوالیو یو شمېر کلي یې د وسله والو طالبانو تر کنټرول لاندې دي او وخت ناوخته له دغو ښوونځیو څارنه ترسره کوي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. AcceptRead More