د کابل پولیس دوه برابره کېږي؛ ایا حکومت اصلاحات هېر کړي؟

خبریال وېبپاڼه/ سره له دې چې د پلازمینې کابل په شمول د هېواد ډېری ولایتونو کې زرګونه خیالي پولیس شتون لري او یا په فرعي دندو اخته دي، د ولسمشر غني لومړي مرستیال امرالله صالح خبر ورکړ، چې د امنیتي تړون طرحې د تطبیق په خاطر به د کابل پولیس دوه برابره شي.

د کابل د امنیتي وضعیت د سمون په خاطر دغه ښه اقدام دی او حد اقل د هدفي وژنو او ترهګریزو بریدونو یو څه مخنیوی به وشي، ځکه نسبت ولایتونو ته په پلازمینه کابل کې پولیس خپله اصلي دنده، چې د قانون تنفیذ او د عامه امن او نظم تامین دی، په ښه توګه پرمخ وړلی شي.

خو د خیالي پولیسو په اړه لا هم اندېښنې موجودې دي، نه یوازې په ولایتونو بلکې په کابل کې هم دغه ستونزه شته او د زرګونه پولیسو په نوم د چارواکو جیبونو ته هره میاشت میلیونونه افغانۍ ورځي.

بله مهمه ستونزه دا ده چې د کابل په شمول یو شمېر ولایتونو کې پولیس د خپلو اصلي دندو پر ځای د پخوانیو ټوپکیانو، دولتي چارواکو، قوماندانانو، جهادي مشرانو، سیاسیونو، قومي مشرانو او نورو په ساتنه بوخت دي، چې له امله یې د عامه امن او نظم د تامین چاره په سمه توګه نه ده ترسره شوې.

حکومت ته پکار ده چې د پولیسو د تشکیل د زیاتوالي ترڅنګ د پولیسو په لیکو کې پراخ اصلاحات راولي؛ د خیالي پولیسو مخنیوی، د پولیسو له لیکو د لنډغرو او کوڅه ډبو ایستل، پولیس د اشخاصو د ساتنې پر ځای د قانون د تنفیذ ته راګرځول، پولیس له باجګیري، بدماشي او زورواکۍ راګرځول په دې برخه کې مهم موارد دي چې باید ترسره شي.

په کابل کې تر بل هر وخت د ناامنیو لمن پراخه شوې ده، کابل مېشتي هر سهار د چاودنو په غږ پیلوي، د دې پر ځای چې نېکمرغه سهار پیل کړي او د ښه ژوند هیلې یې را ژوندۍ شي، د مرګ خبرونه اوري.

حکومت ته دا هم پکار ده چې نور د تشو غندنو او اعلامیو پر ځای د خلکو ساتنې ته جدي پاملرنه وکړي او د ټولو هغو پېښو عاملین ونیسي او مجازات یې کړي، چې په دې وروستیو کې پېښې شوې دي.

ښايي دا مو هم خوښ شي

This website uses cookies to improve your experience. We'll assume you're ok with this, but you can opt-out if you wish. Accept Read More

instagram volgers kopen volgers kopen buy windows 10 pro buy windows 11 pro