قطر کې شپږ بجې د تماس ډلې غونډه کوي

خبریال وېبپاڼه/ د طالبانو او افغان حکومت د تماس ډلې نن د قطر پروخت د ماذدیګر ۶ بجې ناسته کوي او د دواړه لورو به شپږ شپږ کسان موجود وي.

دغه څرګندونې طالب سرچینو خبریال وېبپاڼې ته کړې دي.

سرچینې زیاتوي، چې دا ناسته یوازي د خبرو د بهیر د اوږدېدلو او روان ساتلو په هدف کېږي.

د سرچینو په وینا، د طالب پلاوي با صلاحیته کسان لکه ملا برادر او شیخ عبدالحکیم ؛ ملا فاضل انس حقاني او ګڼ نور کسان لا هم په اسلام اباد کې پاکستاني چارواکو را ګرزولي دي.

د مذاکراتو افغان لوري تر اوسه په دې اړه څه نه دي ویلي.

دغه غونډه په داسې حال کې کېږي، چې د طالب پلاوي یو شمېر غړي لا هم په پاکستان کې دي او ویل کېږي، چې هلته له پاکستاني چارواکو سره په سلا او مشوور بوخت دي.

د موقت حکومت رامنځته کېدو روانه ډنډوره هم د پاکستان هغه دسیسه ده چې طالبان او پاکستاني چارواکي دمګړۍ پرې بحث کوي او له امله یې د مذاکراتو بهیر هم بې صلاحیته کسانو ته پاتې دی.

بل خوا د اوربند خبره پر خپل ځای پاتې ده، طالبان وايي چې د له تور لېسته د طالب مشرانو ایستل، د نظام راتلونکې بڼه او د طالب بندیانو خوشې کېدل به د خبرو د اجنډا په سر کې قرار ولري، مګر افغان حکومت وايي چې اوربند به د خبرو په سر کې قرار ولري.

لا معلومه نه ده چې په اوربند به سلا وشي او که موقت حکومت به رامنځته شي، خو د شنونکو په باور طالبان تر هغو اوربند نه کوي څو چې درې اساسي غوښتنې چې نن یې تازه مطرح کړې دي منل شوې نه وي.